म. टा. प्रतिनिधी, पुणे
हृदयप्रत्यारोपणाच्या यशानंतर आता पुण्यातून फुफ्फुसासारखा नाजूक अवयव यशस्वीरित्या काढून चेन्नईला पाठविण्यात यश आले आहे. हे फुफ्फुस चेन्नईतील त्रेसष्ठ वर्षीय ज्येष्ठ महिलेला बसवून त्यांना जीवनदान देण्यात आले आहे. या शिवाय शहरातून आणखी एक हृदय मुंबईला पाठविण्यात आले आहे. शहरातील एका ‘ब्रेनडेड’ पेशंटमुळे पाच जणांचे प्राण वाचले आहेत.
‘मूळची कोल्हापूरची आणि पुण्यात वाघोलीत राहणारी २२ वर्षीय विवाहिता इमारतीवरून खाली पडली. त्यात तिच्या डोक्याला गंभीर दुखापत झाली. त्यामुळे १४ ऑगस्टला तिला रुबी हॉस्पिटलमध्ये दाखल कऱण्यात आले. उपचारादरम्यान ती ब्रेनडेड झाल्याने तिच्या पतीने अवयवदान करण्याचा निर्णय घेतला. त्यामुळे एक हृदय, फुफ्फुस, दोन मूत्रपिंड आणि एक यकृत असे पाच अवयव काढण्यात आले. त्यामुळे पाच जणांना जीवनदान मिळाले. त्यातील फुफ्फुस काढून चेन्नईच्या ग्लोबल हॉस्पिटलमधील ६३ वर्षीय महिलेला बसविण्यात आले. तर मूत्रपिंड सोलापूरमधील अश्विनी हॉस्पिटलमधील पेशंटला दान करण्यात आले,’ अशी माहिती प्रादेशिक प्रत्यारोपण समितीच्या समन्वयक (झेडटीसीसी) आरती गोखले यांनी दिली. ‘संबंधित मृत पेशंटचे हृदय मुंबईतील फोर्टिस हॉस्पिटलमधील पेशंटला दान करण्यात आले. एका ४२ वर्षीय व्यक्तीला यकृत देण्यात आले. चेन्नईहून आलेल्या तज्ज्ञ डॉक्टरांनी फुफ्फुस काढून विशेष विमानाने नेले. तर हृदय ग्रीन कॉरिडॉरद्वारे रुबी हॉस्पिटल ते मुंबई असा प्रवास करून पहाटे नेण्यात आले,’ असे रुबी हॉस्पिटलच्या प्रत्यारोपण विभागाच्या समन्वयक सुरेखा जोशी यांनी सांगितले.
रुबी हॉस्पिटलमध्ये काढण्यात आलेले हृदय मुलूंडच्या फोर्टिस हॉस्पिटलमधील २४ वर्षाच्या तरुणाला देण्यात आले. ग्रीन कॉरिडॉरद्वारे १४३ किलोमीटरचे अंतर अवघ्या १०९ मिनिटांत पूर्ण करण्याचे आव्हान पेलण्यात आले. या तरुणाला कार्डिओमायोपॅथीचा आजार होता.
डॉ. अन्वय मुळे, हृदय प्रत्यारोपण तज्ज्ञ, फोर्टिस हॉस्पिटल, मुलूंड
पुण्यातील अवयवदान एका दृष्टिक्षेपात
५२
मूत्रपिंड प्रत्यारोपण
३२
यकृत प्रत्यारोपण
१
मूत्रपिंड, स्वादुपिंडरोपण
७
हृदयरोपण
३
शहराबाहेर पाठविलेले हृदय
१
फुफ्फुस
२९
ग्रीन कॉरिडॉर
मोबाइल अॅप डाउनलोड करा आणि राहा अपडेट
