चित्रपट पाहण्याचे एक कौशल्य असते आणि ते उत्तमोत्तम चित्रपट पाहून समजते. चित्रपटाची रचना, त्या चित्रपटाचे आस्थाविषय समजून घेऊन ते शोधायला लागते. त्यानंतर चित्रपटाचे कलातत्त्व उमगते. एखादा रसिकप्रिय चित्रपट दीर्घकाळ स्मरणात रेंगाळतो आणि मग त्याच्या रचनेतील कारणमीमांसा समजल्यानंतर चित्रपट कलेतील, तंत्रकुशल गुणवत्तेमागची प्रतिमा उमगते. चित्रपट समजावून घेण्याच्या या गोष्टींमुळेच चित्रपट रसास्वादाचे महत्त्व अधोरेखित होते.
रसास्वादाचे हे महत्त्व ओळखून राष्ट्रीय चित्रपट संग्रहालय व फेडरेशन ऑफ फिल्म सोयायटीज ऑफ इंडियाचा महाराष्ट्र विभाग यांनी सुजाण चित्ररसिक होण्याची संधी उपलब्ध करून दिली आहे. या दोन्ही संस्थांनी एकत्र येऊन ‘रसास्वाद सिनेमाचा’ हे शिबिर १० ते १६ सप्टेंबर २०१६ या कालावधीत संग्रहालयाच्या थिएटरमध्ये आयोजित केले आहे. मराठी भाषेतून चालणारा हा एकमेव उपक्रम आहे. फिल्म इन्स्टिट्यूट व चित्रपट संग्रहालय यांच्यातर्फे गेली ४० वर्षे चालणाऱ्या इंग्रजी भाषेतील फिल्म अॅप्रिसिएशन कोर्सची ही संक्षिप्त आवृत्ती आहे. चित्रपट कलेतील व्यामिश्रता मातृभाषेतून समजावून सांगितली तरच उत्तम मराठी प्रेक्षक निर्माण होईल, या धारणेपोटी या उपक्रमाचे आयोजन केले जात आहे. यंदाचे बारावे वर्षे आहे, अशी माहिती शिबिराचे समन्वयक सतीश जकातदार यांनी दिली.
तज्ज्ञांचे मार्गदर्शन
शिबिरात समर नखाते, विकास देसाई, उमेश कुलकर्णी, श्यामला वनारसे, गणेश मतकरी, उज्ज्वल निरगुडकर, अभिजित रणदिवे, राहुल रानडे, सुधीर नांदगावकर व प्रकाश मगदूम यांची व्याख्याने होणार आहेत. दहा अभिजात चित्रपट व वीस लघुपट दाखविले जाणार असून चित्रपट सौंदर्याविषयी चर्चा केली जाणार आहे. राष्ट्रीय चित्रपट संग्रहालय व राष्ट्रीय चित्रपट आणि दूरचित्र‍वाणी संस्था या संस्थांना अभ्यास भेट देता येणार आहे. हे शिबिर सशुल्क असून शिबिराला व्ही. शांताराम फाउंडेशनचे सहकार्य मिळाले आहे. अधिक माहिती www.nfai.gov.in या वेबसाइटवर उपलब्ध आहे.
मोबाइल अॅप डाउनलोड करा आणि राहा अपडेट
