गुन्हेगाराच्या मदतीने केली दिल्लीत तक्रार; भाजपचा पलटवार
म. टा. प्रतिनिधी, पिंपरी
पिंपरी-चिंचवड महापालिकेच्या ठेकेदारांकडून टक्केवारी घेतली जात असल्याचा आरोप करून पंतप्रधान कार्यालयाकडे तक्रार करणारी प्रमोद साठे नावाची व्यक्ती सराईत गुन्हेगार आणि मोक्कांतर्गत कारवाई झालेली आहे, असा दावा भारतीय जनता पक्षाच्या प्रमुख पदाधिकाऱ्यांनी मंगळवारी पत्रकार परिषदेत केला. अंडरवर्ल्डशी संबंध असलेल्या गुन्हेगाराला तक्रार करण्यास भाग पाडून राष्ट्रवादी काँग्रेसने खालची पातळी गाठल्याचे या पदाधिकाऱ्यांनी स्पष्ट केले.
भाजपचे शहराध्यक्ष आमदार लक्ष्मण जगताप, महापौर नितीन काळजे, सत्तारूढ पक्षनेते एकनाथ पवार, उपमहापौर शैलजा मोरे, माजी महापौर आझमभाई पानसरे, सरचिटणीस सारंग कामतेकर या वेळी उपस्थित होते. त्यांनी साठे यांच्याबाबतची धक्कादायक माहिती नमूद केली. साठे सराईत गुन्हेगार असून, त्याच्यावर मोक्कांतर्गत कारवाई झाली आहे. तसेच तो खुनातील आरोपी असून, एका अंडरवर्ल्ड टोळीतील गुंड असल्याचे स्पष्ट झाले आहे, असे जगताप यांनी नमूद केले. ‘राष्ट्रवादी’च्या स्थायी समितीच्या एका माजी सभापतीने आणि एका विद्यमान नगरसेवकाने साठे याच्याशी संगनमत करून त्याला पंतप्रधान कार्यालयाकडे खोटी तक्रार देण्यास भाग पाडले, असा आरोपही जगताप यांनी केला.
जगताप म्हणाले, ‘महापालिकेतील ठेकेदारांना आतापर्यंत नियमबाह्यपणे बिले दिली जात होती. मात्र, भाजपने सत्तेत आल्यानंतर यापुढे कायद्यातील तरतुदीनुसारच बिले देण्याचा निर्णय घेऊन त्याची अंमलबजावणी सुरू केली. त्याबाबत ठेकेदारांना कोणतीही अडचण नाही. मात्र, ठेकेदारांच्या आडून नियमबाह्यपणे पैसे कमविण्याचा धंदा चालविलेल्या राष्ट्रवादी काँग्रेसच्या पदाधिकाऱ्यांना भाजप नियमाने वागत आहे, हे रूचलेले नाही. राष्ट्रवादीच्या अनेक पदाधिकाऱ्यांच्या नियमबाह्य कामांचे पैसे महापालिकेत अडकल्यामुळे ठेकेदारांच्या खांद्यावर बंदूक ठेवून बिले मिळावीत, यासाठी वेगवेगळ्या प्रकारे दबाव टाकण्याचा त्यांचा प्रयत्न चालू आहे.’
प्रमोद पुरुषोत्तम साठे (प्रत्यक्ष लेखी तक्रारीत केवळ प्रमोद साठे असा उल्लेख आहे.) याने ठेकेदारांची बिले देण्यासाठी टक्केवारी मागितली जात असल्याबाबत पंतप्रधान कार्यालयाकडे केलेली तक्रार सुद्धा ‘राष्ट्रवादी’च्या दबावाचाच एक भाग आहे, असा दावा करण्यात आला. परंतु, साठे महापालिकेचा ठेकेदार आणि या शहरातील रहिवासी नाही. त्याने कोणतेही पुरावे सादर केले नाहीत. तरीही तक्रारीची दखल घेत पंतप्रधान कार्यालयाने चौकशीचे आदेश दिले आहेत. प्रमोद साठे नावाची व्यक्ती भाजपच्या आमदार माधुरी मिसाळ यांचे पती सतीश मिसाळ यांच्या खुनातील आरोपी असून, तो अंडरवर्ल्डमधील एका टोळीतील गुंड आहे. त्याचप्रमाणे त्याला विश्रामबागवाडा पोलिसांनी बिल्डरांकडे खंडणी मागितल्या प्रकरणी अटकही केली होती. तो सराईत गुन्हेगार असून, त्याच्यावर मोक्कांतर्गत कारवाई देखील झाली आहे, असे जगताप यांनी सांगितले.
‘भाजपने आत्मपरीक्षण करावे’
तक्रारदार कोण आहे, याचा राष्ट्रवादी काँग्रेसशी संबंध नाही, असा दावा या पक्षाचे शहराध्यक्ष संजोग वाघेरे-पाटील यांनी केला आहे. ते म्हणाले, ‘आमच्या सांगण्यावरून प्रमोद साठे नावाच्या व्यक्तीने तक्रार केलेली नाही. त्याच्याशी बोलून खात्री केल्यानंतरच आम्ही पत्रकार परिषद घेऊन भूमिका स्पष्ट केली. त्याने धमकीचे फोन येत असल्याचे आम्हाला सांगितल्यावर आम्ही पोलिस संरक्षणाची मागणी केली. तो या देशाचा नागरिक आहे. पाकिस्तानचा नाही. त्यामुळे गुन्हेगाराला पाठीशी घालण्याचा प्रश्नच येत नाही. आमच्यावर पलटवार करणाऱ्यांनी आत्मपरीक्षण करावे. स्वतः काय दिवे लावले हे तपासावे, मगच आमच्यावर आरोप करावेत.’
मोबाइल अॅप डाउनलोड करा आणि राहा अपडेट