Maharashtra Times

म. टा. वृत्तसेवा, सोलापूर

राज्य सरकारने रविवारी पंढरपूरच्या विठ्ठल-रुक्मिणी मंदिर समितीची घोषणा केली होती. कराडमधील भाजप नेते अतुल भोसले यांच्या अध्यक्षतेखाली एकूण नऊ जणांचा या समितीत समावेश आहे. मात्र, वारकऱ्यांनी त्यावर आक्षेप घेतला असून, या समितीत वारकऱ्यांचा कुणीही प्रतिनिधी नसून, समितीत वाकऱ्यांच्या प्रतिनिधींचा समावेश करावा, अशी मागणी करीत वारकऱ्यांनी माउलींची पालखी सरगम टॉकीजसमोर थांबवून ठिय्या आंदोलन केले. दरम्यान, मुख्यमंत्र्यांनी मंदिर समितीत वारकऱ्यांच्या प्रतिनिधीचा समावेश करण्याची ग्वाही दिल्यानंतर आंदोलन मागे घेण्यात आले. सुमारे तीन लाख वारकऱ्यांनी दीड तास आंदोलन केले.

आषाढी एकादशीच्या एक दिवस अगोदर पंढरपूरच्या विठ्ठल-रुक्मिणी मंदिर देवस्थान समितीची सरकारने घोषणा केली. कराडचे भाजप नेते अतुल भोसले समितीचे अध्यक्ष असून, आमदार रामचंद्र कदम, शकुंतला विजयकुमार नडगिरे, दिनेशकुमार कदम, सचिन अधटराव, भास्करगिरी गुरू किसनगिरी बाबा, गहिनीनाथ ज्ञानेश्वर महाराज औसेकर, संभाजी हिरालाल शिंदे यांची सदस्य म्हणून नियुक्ती करण्यात आली. पंढरपूर नगरपालिकेच्या नगराध्यक्षा साधना भोसले पदसिद्ध सदस्य आहेत.

‘या मंदिर समितीमध्ये राजकारण्यांचा भरणा करण्यात आला आहे. त्यामुळे ही समिती बरखास्त करून वाकऱ्यांचे प्रतिनिधी असलेल्या नवी समिती स्थापन करण्यात यावी,’ या मागणीसाठी माउलींच्या पालखीतील वारकऱ्यांनी आंदोलन सुरू केले आहे. सुमारे तीन लाख वारकऱ्यांनी आंदोलनात भाग घेतला. मुख्यमंत्र्यांनी मंदिर समितीत वारकऱ्यांच्या प्रतिनिधींचा समावेश करण्याची ग्वाही दिल्यानंतर आंदोलन मागे घेऊन पालखी मार्गस्थ झाली. सुमारे दीड तास आंदोलन सुरू होते.

Latest Images