म. टा. प्रतिनिधी, पिंपरी
पुणे-मुंबई एक्स्प्रेस वे-वर थांबलेल्या मोटारचालकाला लुटून पळून जाण्याच्या प्रयत्नात असणाऱ्या टोळीला तळेगाव पोलिसांनी गजांआड केले आहे. अटक झालेल्यांमध्ये राज्याच्या विविध भागांसह नवी दिल्ली परिसरातील आंतरराज्य टोळीतील गुन्हेगारांचा समावेश आहे.
अटक केलेले सर्व जण नगर जिल्ह्यातील नेवासा येथील आहेत. त्यामध्ये अविनाश अरुण खंडागळे (वय २२) , कैलास लक्ष्मण चांदणे (वय २३ ) संतोष सुंदर घुणे (वय २३ ) संदीप कचरू भालेराव (वय २७), सचिन रतन कांबळे (वय २०), बाळकृष्ण ज्ञानेश्वर मंडलीक (वय २५) आणि प्रदीप ज्ञानेश्वर मंडलिक (वय २२) यांचा समावेश असून, त्यांच्यावर खून, अपहरण, दरोडा, खंडणी आणि बलात्कार आदी गंभीर गुन्हे दाखल असल्याचे उघड झाले आहे.
वरिष्ठ पोलिस निरीक्षक मुगूट पाटील यांनी दिलेल्या माहितीनुसार, कमलसिंग लोणावळ्याहून पुण्याकडे कारने येत असताना पहाटे दोनच्या सुमारास पुणे-मुंबई एक्स्प्रेस वे-वर थांबले. ही संधी साधून पाच ते सात आरोपींनी कोयता आणि चाकूचा धाक दाखवून त्यांच्याकडून पाच हजार रुपये रोख आणि सोने असा सुमारे पन्नास हजार रुपयांचा ऐवज लाटला. कमलसिंग उर्से टोलनाका येथे आले असता, त्यांनी पोलिसांना घटनेची माहिती दिली. मात्र, मुलगी आजारी असल्यामुळे ते तडक दवाखान्यात गेले. त्यांनी केलेल्या वर्णनानुसार फौजदार ज्ञानेश्वर बाजीगरे यांनी शोध घ्यायला सुरुवात केली. त्या वेळी आरोपी पळून जाण्याच्या तयारी असल्याचे त्यांना समजले. दरम्यान, एक आरोपी गाडीत बसू न शकल्याने नजीकच्या डोंगरात पळून गेल्याचे समजले. त्यामुळे पोलिस आरोपीचा माग काढून एका ठिकाणी लपून बसले. त्यानंतर मागे राहिलेल्या आरोपीला घेऊन जाण्यासाठी उर्वरित आरोपी परतले. आरोपींनी पोलिसांना पाहताच धूम ठोकली. त्या वेळी टोळीचा प्रमुख प्रदीप मंडलिक पळून जाताना पुलावरून उडी मारली. त्यात त्याचे दोन्ही पाय फ्रॅक्चर झाले.
मागील आठवड्यातही लुटले
गेल्या आठवड्यात एका कुटुंबाला याच आरोपींनी लुटले होते. आरोपींवर नवी दिल्ली, अहमदनगर, बुलडाणा, पुणे ग्रामीण येथे दरोडा, दरोड्याची तयारी, जबरी चोरी असे गुन्हे दाखल आहेत. त्यांच्याविरोधात मोका अंतर्गत गुन्हा दाखल करण्यात आला आहे.
मोबाइल अॅप डाउनलोड करा आणि राहा अपडेट
