म. टा. प्रतिनिधी, पुणे
कचऱ्याचा प्रश्न दिवसेंदिवस गंभीर होत चालला असताना पुणेकर कचराकोंडीत अडकले आहेत. त्यावर सत्ताधारी बोलण्यास तयार नाहीत, तर दुसरीकडे विरोधकांनीही केवळ आंदोलनांचा सपाटा लावला आहे. त्यामुळे कचरा प्रश्न सोडवण्यापेक्षा त्यावर राजकारण सुरू झाल्याची भावना व्यक्त होत आहे.
उरळी देवाची येथील कचरा डेपोमध्ये कचरा टाकण्यास ग्रामस्थांनी विरोध केला आहे. गेल्या २० दिवसांपासून हे आंदोलन सुरू आहे. त्यामुळे शहरात कचरा कोंडीचे चित्र आहे. दुसरीकडे काँग्रेस-राष्ट्रवादी काँग्रेस, महाराष्ट्र नवनिर्माण सेना (मनसे) आणि आता शि‍वसेनेही आंदोलनाची भूमिका घेतली आहे. कचरा प्रश्न सोडवण्यापेक्षा त्यावरील राजकीय चिखलफेकीला सुरुवात झाल्याची भावना व्यक्त होत आहे.
राष्ट्रवादी काँग्रेसने खासदार सुप्रिया सुळे यांच्या नेतृत्वाखाली महापालिकेच्या आवारात गुरुवारी दुपारी आंदोलन केले. भारतीय जनता पक्ष, पालकमंत्री गिरीश बापट, महापौर मुक्ता टिळक यांच्या विरोधात जोरदार घोषणा देण्यात आल्या. त्यानंतर सुळे यांनी पालिका आयुक्त कुणाल कुमार यांची भेट घेऊन त्यांच्याशी कचरा प्रश्नावर चर्चा केली.
शिवसेनेनेही कचरा समस्येवर आंदोलनाची भूमिका घेऊन जोरदार घोषणाबाजी केली. शिवसेनेचे गटनेते संजय भोसले, माजी गटनेते अशोक हरणावळ, नगरसेवक बाळा ओसवाल, विशाल धनवडे, नाना भानगिरे, संगीता ठोसर, पल्लवी जावळे, श्वेता चव्हाण आदींनी भाजपला लक्ष्य करून आंदोलन केले. पालिकेच्या प्रवेशद्वारावर कचरा फेकण्यात आला. कचरा कोंडीचा प्रश्न लवकरात लवकर सोडविला नाही, तर तीव्र आंदोलन करण्याचा इशारा या वेळी देण्यात आला.
राष्ट्रवादी काँग्रेसने दोन दिवसांपूर्वी खासदार वंदना चव्हाण यांच्या नेतृत्वाखाली आंदोलन केले होते. तर, काँग्रेसने बुधवारी काँग्रेस भवन ते महापालिका असा मोर्चा काढून सत्ताधाऱ्यांवर टीका केली होती. मनसेनेही महापौर टिळक यांच्या घरासमोर कचरा ओतून आंदोलन केले होते. मात्र, पुण्यातील कचरा कसा कमी होईल आणि पुणेकरांची यातून कशी सुटका होईल, याबाबत फारसे कोणी गंभीर असल्याचे दिसत नाहीत. पालकमंत्री बापट आणि महापौर टिळक अशा परिस्थितीत परदेश दौऱ्यावर गेले असल्याने विरोधकांच्या हातात आयतेच कोलीत सापडले असून त्यांच्याकडून सत्ताधाऱ्यांचा समाचार घेण्यात येत आहे.
मुख्यमंत्री फडणवीस निगरगट्ट
‘निवडणूक आली, की आश्वासनांची खैरात करणारा भारतीय जनता पक्ष कचऱ्याबाबत असंवेदनशील असून मुख्यमंत्री फडणवीस हे निगरगट्ट झाले आहेत,’ अशी टीका खासदार सुप्रिया सुळे यांनी गुरुवारी केली. अडीच वर्षापूर्वी कचऱ्याबाबत मुख्यमंत्री फडणवीस यांनी उरुळी देवाची आणि फुरसुंगी येथील ग्रामस्थांना दिलेला शब्द पाळावा, अशी अपेक्षा सुळे यांनी व्यक्त केली.
राष्ट्रवादी काँग्रेसच्या वतीने सुळे यांच्या नेतृत्वाखाली आंदोलन झाले. सुळे म्हणाल्या, ‘निवडणुकीत मुख्यमंत्री आश्वासनांची खैरात करतात; मात्र त्यानंतर त्यांना दिलेल्या शब्दाचा विसर पडतो. शहरातील कचरा तीन आठवड्यांपासून उचलला जात नसल्याने पुणेकरांच्या आरोग्याचा प्रश्न गंभीर झाला आहे. मात्र, महापौर मुक्ता टिळक, पालकमंत्री गिरीश बापट यांच्यासह मुख्यमंत्री फडणवीस यावर तोडगा काढण्यासाठी उपलब्ध होत नाहीत, ही अत्यंत दुर्दैवी बाब आहे.’
पंतप्रधानांना टॅग करणार
देशाचे पंतप्रधान नरेंद्र मोदी यांनी स्वच्छ भारत मोहीम सुरू केले. राज्यातील भाजपच्या सत्ताधाऱ्यांना मोदी यांच्या मोहिमेचा विसर पडला आहे. शहरातील कचरा प्रश्न सोडवावा, यासाठी तीन वेळा टॅग करूनही फडणवीस यांनी दखल घेतली नाही. कचऱ्याबाबत त्यांना फारसे गांभीर्य नसल्याने पंतप्रधान मोदी यांनाच टॅग करणार असून स्वच्छ भारत मोहिमेच्या पार्श्वभूमीवर महात्मा गांधी यांचा गोल चष्मा घालून हे आंदोलन करीत असल्याचे सुळे यांनी सांगितले.
‘कचरा डेपोसाठीची जागा ताब्यात घ्या’
पुण्यात कचऱ्याचा प्रश्न निर्माण झाला असल्याने पिंपरी सांडस येथील कचरा डेपोसाठी निश्चित केलेली जागा ताब्यात घेण्याची प्रक्रिया ताबडतोब सुरू करण्याची मागणी उपमहापौर नवनाथ कांबळे यांनी जिल्हाधिकारी सौरव राव यांच्याकडे केली आहे.
उपमहापौर कांबळे यांनी जिल्हाधिकारी राव यांना निवेदन सादर केले. या वेळी नगरसेवक डॉ. सिद्धार्थ धेंडे, रिपब्लिकन पार्टी ऑफ इंडिया (आरपीआय) शहराध्यक्ष महेंद्र कांबळे, शिक्षण मंडळ सदस्य बाळासाहेब जानराव आदी उपस्थित होते. उरुळी देवाची आणि फुरसुंगी येथील कचरा प्रकल्पांमध्ये गेल्या १९ दिवसांपासून कचरा टाकून देण्यात येत नसल्याने पुणेकारांच्या आरोग्याचा प्रश्न निर्माण झाला आहे. त्यामुळे कचरा डेपोच्या जागेचा प्रश्न तातडीने सोडविण्याची सूचना उपमहापौर कांबळे यांनी केली.
‘पिंपरी सांडसला कचरा टाकू देणार नाही’
‘स्थानिक ग्रामस्थांचा विरोध असतानाही पिंपरी सांडस येथील जागा कचरा प्रकल्पासाठी देण्याचा निर्णय जिल्हाधिकारी सौरव राव यांनी घेतला आहे. ग्रामस्थांबरोबर कोणतीही चर्चा न करता परस्पर हा निर्णय घेतला जात असून कोणत्याही परिस्थितीमध्ये पिंपरी सांडस येथे कचरा टाकू दिला जाणार नाही,’ असा इशारा राष्ट्रवादी काँग्रेसचे प्रवक्ते विकास लवांडे यांनी गुरुवारी दिला.
पुणे शहराचा कचरा टाकण्यासाठी पिंपरी सांडस येथील वनखात्याची जमीन महापालिकेला देण्याचा निर्णय राज्य सरकारने घेतला आहे. यासाठीची मोजणी पूर्ण झाली असून ही जागा हस्तांतरण करण्याचा प्रस्ताव अंतिम टप्प्यात आल्याचे जिल्हाधिकारी राव यांनी सांगितले होते. पिंपरी सांडस येथे सामाजिक वनीकरणामार्फत मोठ्या प्रमाणात वृक्षारोपण करण्यात आले आहेत. या गावाच्या जवळच तीर्थक्षेत्र बोल्हाई मातेचे मंदिर आहे. या गावासह आजूबाजूच्या ग्रामपंचायतींनी कचरा प्रकल्प येथे नको, म्हणून ठराव करून जिल्हाधिकाऱ्यांकडे यापूर्वीच पाठविले आहेत. कचरा डेपो; तसेच कचरा प्रकल्प उभारण्याबाबत जिल्हा प्रशासनाने एकही बैठक ग्रामस्थांबरोबर घेतलेली नाही. कचऱ्यासाठी जागा देण्यास ग्रामस्थांचा विरोध असून प्रशासनाने मनमानी केल्यास आंदोलन करण्याचा इशारा लवांडे यांनी दिला आहे.
मोबाइल अॅप डाउनलोड करा आणि राहा अपडेट
