डेक्कन एज्युकेशन सोसायटीतर्फे देण्यात येणारा ‘प्रथम अध्यक्ष राजर्षी शाहू छत्रपती पुरस्कार’ राष्ट्रीय स्वयंसेवक संघाच्या जनकल्याण समितीला बुधवारी जाहीर करण्यात आला. जलसंधारण क्षेत्रातील उल्लेखनीय कार्याबद्दल समितीला जाहीर करण्यात आला. एक लाख रुपये, सन्मान चिन्ह आणि मानपत्र असे पुरस्काराचे स्वरूप आहे.
सोसायटीच्या परिषदेचे व नियामक मंडळाचे उपाध्यक्ष विकास काकतकर यांनी ही माहिती दिली. नियामक मंडळाचे सदस्य राम निंबाळकर, प्रा. आनंद भिडे उपस्थित होते. केंद्रीय रस्ते वाहतूक मंत्री नितीन गडकरी यांच्या हस्ते येत्या रविवारी (७ मे) सायंकाळी साडेपाच वाजता फर्ग्युसन कॉलेजच्या एन. एम. वाडिया अॅम्फी थिएटरमध्ये हा पुरस्कार वितरण समारंभ होईल. सोसायटीचे अध्यक्ष शाहू छत्रपती कार्यक्रमाचे अध्यक्षस्थान भूषविणार आहेत. या वेळी महापौर मुक्ता टिळक उपस्थित राहतील. सोसायटीचे पहिले अध्यक्ष राजर्षी शाहू छत्रपती यांच्या सन्मानार्थ २०१६पासून पुरस्कार देण्यात येत आहे. शिक्षण, विज्ञान किंवा पर्यावरण क्षेत्रात वीस वर्षांहून अधिक काळ समाजोपयोगी काम करणाऱ्या व्यक्ती किंवा संस्थेला हा पुरस्कार देण्यात येतो, असे काकतकर यांनी सांगितले.
जनकल्याण समिती १९७३पासून महाराष्ट्रात कार्यरत आहे. वनवासी विकास, ग्राम आरोग्यरक्षक, पूर्वांचल विकास, आपत्ती निवारण, आदर्श रुग्णसेवा, शिक्षण प्रकल्प आदी समितीचे मुख्य उपक्रम आहेत. गेल्या वर्षी समितीने दुष्काळ निवारण व जलसंधारणात राज्यात विशेष उल्लेखनीय कार्य केले होते. समितीची एकूण १ हजार ३९० सेवाकार्ये आहेत. तसेच, समितीतर्फे सात मोठे प्रकल्प सुरू आहेत. निवड समितीत काकतकर यांच्या अध्यक्षतेखाली उद्योगपती डॉ. अभय फिरोदिया, एअरमार्शल (निवृत्त) भूषण गोखले, राष्ट्रीय अल्पसंख्याक आयोगाचे अध्यक्ष भिकूजी उर्फ दादा इदाते, कार्यवाह प्रा. आनंद भिडे यांचा समावेश आहे. पहिला पुरस्कार नवी दिल्लीच्या एकल विद्यालय फाउंडेशनला प्रदान करण्यात आला होता.
मोबाइल अॅप डाउनलोड करा आणि राहा अपडेट
