बसमधून मोफत प्रवास केव्हा?

April 9, 2017, 2:30 pm

≫ Next: मेट्रो मार्गिकांचे होणार मूल्यांकन

≪ Previous: ज्येष्ठांच्या पेन्शनचे झाले काय?

म. टा. प्रतिनिधी, पुणे

शहराच्या सार्वजनिक वाहतुकीचा कणा असलेल्या पुणे महानगर परिवहन महामंडळाकडे (पीएमपी) अधिकाधिक नागरिकांनी आकर्षित व्हावे. त्यांनी खासगी वाहने न वापरता, सार्वजनिक वाहतूक सेवेचा वापर करावा, यासाठी महिन्याच्या शेवटच्या सोमवारी पीएमपीतून मोफत प्रवास देण्याच्या योजनेचा ठराव पुणे महानगरपालिकेने चार महिन्यांपूर्वी मान्य केला. पीएमपीचे अध्यक्ष व व्यवस्थापकीय संचालक तुकाराम मुंढे त्या ठरावाची तत्परतेने अंमलबजावणी करणार का, असा प्रश्न माजी उपमहापौर आबा बागुल यांनी उपस्थित केला.

पीएमपीच्या अध्यक्ष व व्यवस्थापकीय संचालक पदाची सूत्रे हाती घेतल्यानंतर मुंढे यांनी नियमांचा व कारवाईचा धडाका लावला आहे. पीएमपीच्या सक्षमीकरणाला चालना देण्यासाठी त्यांनी कडक पावले उचलली आहेत. पीएमपीकडे अधिकाधिक प्रवाशांना आकर्षिक करण्यासाठी शेवटच्या सोमवारी मोफत प्रवास उफलब्ध करून देण्याचा महापालिकेने ठराव केला होता. त्यामुले मुंढे आता पुणेकरांना दिलासा देतात का याकडे सर्वांचे लक्ष लागले आहे. विशेष म्हणजे पीएमपीला तोट्यातून वाचविण्यासाठी; तसेच या योजनेचा आर्थिक भार पडू नये, यासाठी सुमारे पावणेदोन कोटी रुपयेही महापालिका पीएमपीला देणार आहे, असे बागूल यांनी म्हटले आहे.

सार्वजनिक वाहतूक सेवेचा वापर अधिकाधिक वाढावा, त्याचबरोबर एक दिवस तरी प्रदूषण टळावे आणि इंधन बचतीलाही चालना मिळावी या उद्देशाने तत्कालीन उपमहापौर बागुल यांनी महिन्याच्या शेवटच्या सोमवारी पीएमपीतून पुणेकरांना मोफत प्रवासाबाबत ठराव दिला होता. स्थायी समितीसह मुख्यसभेनेही एकमताने संमत करून तो पीएमपीकडे पाठविला होता. मात्र, त्याची अंमलबजावणी अद्यापही झालेली नाही.

योजना राबवणे तूर्तास अशक्य

पीएमपीकडून पुणे आणि पिंपरी-चिंचवड महापालिकांच्या हद्दीत सेवा दिली जाते. त्यामुळे या योजनेची अंमलबजावणी करण्यासाठी पुणे महापालिकेबरोबरच पिंपरी-चिंचवड महापालिकेकडूनही या योजनेसाठी हिरवा कंदील दाखविण्याची गरज आहे. मात्र, अद्याप पिंपरी-चिंचवड महापालिकेकडून मान्यता मिळालेली नाही. त्यामुळे ही योजना राबविणे तूर्तास शक्य नाही.

Latest Images