म. टा. प्रतिनिधी, पुणे
‘सगळ्यांसाठी गुणवत्तापूर्ण शिक्षण’ ही कल्पना प्रत्यक्षात आणण्यासाठी, देशातील चार संस्थांना मिळून येत्या दोन वर्षांत ८४ लाख डॉलर्स निधी देण्याची घोषणा गूगलने केली आहे. ‘शिक्षणसाहित्य आणि माहिती यांची उपलब्धता ही गूगल मूल्यव्यवस्थेच्या केंद्रस्थानी आहे,’ असे प्रतिपादन गूगल शिक्षण विभागाचे प्रमुख ब्रिजिट हॉयर गोसलिंक यांनी केले.
‘गुगलकडून आर्थिक मदत मिळणाऱ्या देशातील चार संस्थांमध्ये प्रथम बुक्सचा समावेश आहे. जगातील सर्वांत अवघड प्रश्न सोडवण्यासाठी ज्यांनी माहिती आणि आकडेवारी यांच्या आधारे मूलगामी स्वरूपाचा नवा आणि कल्पक उपक्रम सुरू केला आहे, अशा संस्थांची निवड या कार्यक्रमांतर्गत करण्यात आली आहे. स्टोरीविव्हर हे प्रथम बुक्सचे खुले डिजिटल व्यासपीठ असून, मुलांसाठी गोष्टींचा मोठा खजिना येथे उपलब्ध आहे. या उपक्रमासाठी प्रथम बुक्सची निवड करण्यात आली आहे,‘ अशी माहिती प्रथम बुक्सच्या संपादक संध्या टाकसाळे यांनी दिली.
यातील सोपी साधने म्हणजे एम्बेडेड टूल्स वापरून गोष्टी वाचता येतात, अनुवादित करता येतात, लिहिता येतात आणि मूळ गोष्टी नव्या रूपात आणता येतात. सुरुवातीला २४ भाषांमध्ये ८०० गोष्टी या व्यासपीठावर उपलब्ध होत्या आणि केवळ १८ महिन्यांच्या कालावधीमध्ये ही संख्या ६७ भाषा आणि ३१०० गोष्टींवर पोहोचली आहे. सर्व मिळून, दहा लाख वेळा या गोष्टी वाचल्या गेल्या असून एक लाख वेळा डाउनलोड झाल्या आहेत. गुगलकडून मिळणाऱ्या निधीमुळे प्रथम बुक्सला प्रचंड मोठ्या प्रमाणात नवे वाचन साहित्य बाल-वाचकांना ‘स्टोरीविव्हर’वर उपलब्ध करून देता येणार आहे, असेही टांकसाळे म्हणाल्या.
प्रथम बुक्सच्या अध्यक्ष सुझान सिंग म्हणाल्या, की ‘मुलांना आपल्या मातृभाषेतून वाचनसाहित्य मोठ्या प्रमाणात उपलब्ध व्हावे, यासाठी एक मोठी ताकद म्हणून तंत्रज्ञानाचा वापर प्रथम बुक्स करत आहे. सामाजिक प्रकाशन म्हणून एक नवेच प्रारूप स्टोरीविव्हरद्वारे पुढे आले आहे. यामध्ये कॉपीराइट-मुक्त खुल्या आशयाची ताकद आहे. साक्षरतेसाठी हे महत्वाचे पाऊल आहे. त्यासाठीच विविध भाषांमध्ये वाचन साहित्याचा खजिना सर्व मुलांसाठी उपलब्ध करून देणे, तो सुद्धा जागतिक पातळीवर, हे स्टोरीविव्हरचे उद्दिष्ट्य आहे.'
मोबाइल अॅप डाउनलोड करा आणि राहा अपडेट