रस्त्यापासून शहराच्या कोणत्याही गल्लीत ‘देवगड हापूस’ म्हणून दुसराच कुठला तरी आंबा विकून उत्पादकांसह ग्राहकांची होणारी फसवणूक रोखण्यासाठी देवगड तालुका आंबा बागायतदार आणि व्यापारी संघाने कंबर कसली आहे. देवगड हापूस आंब्याचे ‘ब्रॅन्डिंग’ करून त्याची अस्सल चव खव्वैय्यापर्यंत पोहोचविण्यासाठी व्यापारी संघ प्रयत्न करणार आहे.
देवगड तालुक्याच्या बागांमध्ये आंबा नैसर्गिकरित्या पिकवून थेट ग्राहकांना विकला जाणार आहे. देवगड हापूसची गुणवत्ता टिकविण्यासाठी उत्पादकांमध्ये संघाने जनजागृती केली आहे. यासंदर्भात आंबा बागायतदार व्यापारी संघाच्या पदाधिकाऱ्यांनी माहिती दिली. उत्पादक संघाचे अध्यक्ष पुरुषोत्तम ओगले म्हणाले, ‘पुण्यात कोठेही रस्त्यावरील विक्रेत्याकडे चौकशी केल्यास देवगड हापूस आंबाच विकत असल्याचे विक्रेता सांगतो. परंतु, प्रत्यक्षात देवगड हापूस आंबा थेट मार्केटयार्डात विक्रीला येतो. देवगड हापूस सांगून दुसऱ्या आंब्याची विक्री करीत असल्याचे प्रकार घडले. देवगड हापूस आंब्याच्या उत्पादकांसह ग्राहकांची होणारी फसवणूक रोखण्यासाठी पावले उचलली आहेत. आमच्या संघाचे सदस्य शेतकऱ्यांकडून आंबा घेऊन तो बाजारात आणणार आहोत. एक एप्रिलपासून पुण्याच्या मार्केट यार्डातील आंब्याचे व्यापारी शेखर कुंजीर यांच्याकडे विक्रीसाठी उपलब्ध होतील. त्याद्वारे देवगडची खरी चव, गुणवत्ता आणि प्रतवारीनुसार ग्राहकांसह शेतकऱ्यांना परवडतील, असे दर निश्चित केले जातील.’
उत्पादक संघाचे कोषाध्यक्ष विद्याधर जोशी म्हणाले, ‘पातळ साल असलेल्या नाजूक देवगड आंबा १५० ते ३५० ग्रॅम वजनापर्यंत असतो. त्याची साल हाताने सहज निघते. केशरी रंगाचा हा आंबा बाजारात उत्पादक संघाचे लेबल असलेल्या पॅकिंगमध्येच विकला जाईल. त्याशिवाय, त्या पॅकिंगवर संबंधित शेतकऱ्याला दिलेला बारकोड क्रमांक असणार आहे. आंबा चांगला आहे किंवा खराब यासंदर्भात तक्रार करण्यासाठी उत्पादक संघाचा संपर्क क्रमांक दिला जाणार आहे. बागेत आंबा नैसर्गिकरित्या ४० टक्के पिकवून त्याचे पॅकिंग केले जाईल. १५० ते २००, २२० ते २२५ अशा विविध पाच प्रकारांत वर्गवारी करून त्याचे पॅकिंग करण्यात येईल. पुण्यासह मुंबई, नाशिक, कराड येथे आंबा विक्री प्रतिनिधी नेमणार आहोत.’
उत्पादक संघ काय करणार
उत्पादक व व्यापारी संघाच्या शेतकऱ्यांकडून आंबा घेणार
नैसर्गिकरीत्या बागेतच आंबा पिकवून बाजारात आणणार
बागेत १५० ते ३०० ग्रॅम वजनाचे आंब्याचे वर्गीकरण, प्रतवारी करणार
प्रतवारीनुसार आंब्याचे पॅकिंग
प्रतवारीनुसार दर निश्चित
आंब्याच्या पेटीच्या पॅकिंगवर शेतकऱ्याच्या विशेष कोड क्रमांकासह संघाचे लेबल असणार
अनेक वर्षांपासून आम्ही देवगडच्या शेतकऱ्यांचा अस्सल चवीचा आंबा विकतो. चांगल्या दर्जाचा आंबा यापुढेही उपलब्ध केला जाणार आहे. त्यामुळे ग्राहकांची फसवणूक होणार नाही याची काळजी घेतली जाईल.
सिद्धार्थ कुंजीर, आंबा विक्रेते, मार्केट यार्ड
तयार हापूस आंब्याला ‘डिमांड’
गुढी पाडव्याचा सण अवघ्या दोन दिवसांवर येऊन ठेपल्याने रत्नागिरीच्या तयार हापूस आंब्याच्या खरेदीसाठी ग्राहकांसह व्यापाऱ्यांनी मार्केट यार्डात गर्दी केली आहे. मागणीच्या तुलनेत तयार हापूस आंबा बाजारात उपलब्ध नसल्याने चार ते सहा डझनांच्या पेटीमागे दोनशे रुपयांनी वाढ झाली आहे. येत्या काही दिवसांत आवक वाढण्याची शक्यता असून त्यानंतर सामान्यांच्या आवाक्यात आंबा येऊ शकेल, असा अंदाज व्यापारी वर्गाने वर्तविला आहे.
गुढी पाडव्याच्या सणाला अनेक जण आंबा घरात आणला जावा, अशी सर्वसामान्य पुणेकरांची अपेक्षा असते. दर वर्षी पाडव्याच्या मुहूर्तावर आंबा खरेदी केली जाते. परंतु, गेल्या काही वर्षापासून आंब्याला पोषक हवामान नसल्याने उत्पादनाला फटका बसल्याचे दिसून आले. परिणामी, आंब्याचे उत्पादन घटल्याचे आढळले. यंदा मात्र आंब्याच्या उत्पादनासाठी पोषक हवामान असल्याने उत्पादन चांगले हाती येण्याची शक्यता व्यापाऱ्यांसह उत्पादन बोलून दाखवित आहेत.
आंब्याचे व्यापारी करण जाधव म्हणाले, ‘गुढी पाडव्यानिमित्त मार्केटयार्डात चार ते सहा हजार हापूस आंब्याच्या पेट्यांची रत्नागिरीहून आवक झाली आहे. गेल्या आठवड्यात ही आवक कमी होती. बाजारात कच्च्या मालाची अधिक आवक झाली होती. कोकणातून मुंबई, अहमदाबाद येथे आंबा विक्रीसाठी जातो. परंतु, रविवारी तेथील बाजार बंद असल्याने ही आवक पुण्याकडे वळाली. त्यामुळे मोठ्या प्रमाणात आवक झाली. आवक अधिक झाली असली, तरी कच्च्या मालामागे दोनशे रुपयांनी पेटीमागे दर उतरले आहेत. पाडव्यासाठी तयार हापूस आंब्याला अधिक मागणी होत आहे. तयार आंबा बाजारात पुरेशा प्रमाणात उपलब्ध नाही. त्यामुळे पेटीमागे दोनशे रुपयांनी वाढ झाली आहे.’
पाडव्यानंतर रत्नागिरीहून हापूस आंब्याची आवक वाढण्याची शक्यता आहे. चार ते पाच एप्रिलनंतर खऱ्या अर्थाने आंब्याचा हंगाम सुरू होईल. संपूर्ण हंगामात आतापेक्षा दीडपट अधिक आवक वाढण्याची शक्यता आहे. आवक वाढल्यानंतर आंब्याचे दर सामान्यांच्या आवाक्यात येतील. गेल्या वर्षीच्या तुलनेत यंदाच्या दरात एक हजार रुपयांनी दर उतरले आहेत, अशी शक्यता आंब्याचे व्यापारी नाथ खैरे यांनी व्यक्त केली.
कर्नाटक आंब्याचे व्यापारी रोहन उरसळ म्हणाले, ‘कर्नाटक, मद्रास आंब्याची सध्या पाच ते सहा हजार पेटींची आवक झाली आहे. ही आवक वाढली, तरीही दर टिकून आहेत. पाडव्याच्या मुहूर्तावर आंब्याच्या खरेदीला जोर वाढला आहे. आतापर्यंत पुण्यातून कर्नाटक आंब्याची खरेदी होत होती. परंतु, पुणे जिल्ह्यासह नजीकच्या परिसरातील व्यापाऱ्यांसह ग्राहकांकडून आंबा खरेदी होऊ लागली आहे. गेल्या वर्षाच्या तुलनेत सध्याची आवक ही खूप लवकर झाली आहे. तयार आंब्याला अधिक मागणी आहे.’
रत्नागिरीच्या आंब्याचे दर
रत्नागिरी हापूस आंबा (कच्चा) ४ ते ६डझन.............१४०० ते १८००
रत्नागिरी हापूस आंबा (तयार ) ६ ते १०......................... २००० ते ३५००
रत्नागिरी हापूस (तयार) ४ ते ६डझन................ २५०० ते ३०००
रत्नागिरी हापूस (तयार) ६ ते १० डझन............... ३००० ते ५०००
मोबाइल अॅप डाउनलोड करा आणि राहा अपडेट
