म. टा. प्रतिनिधी, पुणे
शहर आणि परिसरातील उकाडा मोठ्या प्रमाणावर वाढला आहे. राज्यभरही तीव्र उन्हाळा जाणवू लागला आहे. पुण्यात शनिवारी ३८.३ अंश सेल्सिअस कमाल तापमानाची नोंद झाली. लोहगाव येथे ३९.५ अंश सेल्सिअस कमाल तापमान नोंदले गेले. पुढील दोन दिवसांत पुण्यातील तापमानात आणखी वाढ होण्याची शक्यता वर्तविण्यात आली आहे.
शहरात शनिवारी नोंदले गेलेले कमाल तापमान हंगामातील सर्वोच्च तापमान आहे. कमाल तापमान उच्चांकी पातळीवर पोहोचल्याने पुणेकरांना दिवसभर उन्हाच्या तीव्र झळा सहन कराव्या लागल्या. आतापर्यंत किमान तापमान कमी राहात होते. त्यामुळे किमान सायंकाळी किंवा रात्री उशिरानंतर पुणेकरांना किंचित दिलासा लाभत होता. मात्र, शनिवारी किमान तापमानही २०.३ अंशांवर पोहोचल्याने दिवसभराचा उकाडा रात्रीही कायम राहिल्याचेच चित्र होते. दरम्यान, लोहगाव येथे ३९.५ अंश सेल्सिअस कमाल तर २२.८ अंश सेल्सिअस किमान तापमान नोंदले गेले.
दक्षिण मध्य महाराष्ट्र, मराठवाडा ते विदर्भापासून कर्नाटकाच्या काही भागापर्यंत हवेचे द्रोणीय क्षेत्र निर्माण झाले आहे. त्यामुळे हवेतील आर्द्रता वाढून उकाडाही अधिक जाणवत आहे. शनिवारी राज्यातील सर्वाधिक कमाल तापमानाची नोंद कोकणातील भीरा येथे (४३ अंश सेल्सिअस) झाली. जळगाव येथे ४०.४, कोल्हापूर येथे ३८.२, महाबळेश्वर येथे ३४.३, मालेगाव येथे ४१.८, सोलापूर येथे ४०.८, रत्नागिरी येथे ३२, भीरा येथे ४३, उस्मानाबाद येथे ३८.९, परभणी येथे ३९.९, अकोला व नागपूर येथे प्रत्येकी ४२ अंश सेल्सिअस कमाल तापमानाची नोंद झाली.
रात्री रंगतायत गप्पांचे फड
शहरात उकाड्याची तीव्रता चांगलीच जाणवत आहे. वाहनचालक सिग्नलला थांबताना सावलीचा आडोसा शोधत आहेत. भरदुपारी रहदारीही लक्षणीयरित्या कमी झाली आहे. टोप्या, छत्र्यांचा वापर वाढला असून, रसवंतीगृह, आइस्क्रीम पार्लर, स्विमिंग पूलमधील गर्दीत वाढ झाली आहे. रात्री उशिरा गावातील वाड्यांबाहेर तसेच उपनगरांमध्येही गप्पांचे फड रंगत असल्याचेही चित्र आहे.
मोबाइल अॅप डाउनलोड करा आणि राहा अपडेट
