म. टा. प्रतिनिधी, पुणे
बारावीच्या पेपरच्या प्रश्नपत्रिका पेपर सुरू होण्याच्या काही मिनिटांपूर्वी फुटून व्हॉट्स अॅपवरून व्हायरल होत आहेत. हा प्रकार थांबविण्यासाठी महाराष्ट्र राज्य माध्यमिक आणि उच्च माध्यमिक शिक्षण मंडळ ठोस उपाययोजना आखण्याऐवजी केवळ कारवाई करण्याचे पोकळ आश्वासन देत असल्याचे चित्र आहे. ‘परीक्षा देणाऱ्या विद्यार्थ्यांची संख्या आणि परीक्षा केंद्रांची संख्या लक्षात घेता केंद्र संचालक व्हॉट्स अॅपवरून पेपर व्हायरल करण्याची शक्यता असू शकते,’ अशी माहिती मंडळाचे अध्यक्ष गंगाधर म्हमाणे यांनी सोमवारी दिली. दरम्यान, बारावीच्या पेपरफुटीच्या गोंधळाच्या पार्श्वभूमीवर राज्यात आज, मंगळवारपासून दहावीच्या परीक्षेला सुरुवात होणार आहे.
मंडळाद्वारे दहावीच्या परीक्षेची माहिती देण्यासाठी पत्रकार परिषद आयोजित करण्यात आली होती. या वेळी म्हमाणे आणि मंडळाचे सचिव कृष्णकुमार पाटील उपस्थित होते. आजपासून सुरू होणारी परीक्षा मंडळाच्या पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळाद्वारे १ एप्रिलपर्यंत घेण्यात येणार आहे. राज्यात एकूण १७ लाख ६६ हजार ०९८ जण परीक्षा देणार असून त्यामध्ये ९ लाख ८९ हजार ९०८ विद्यार्थी; तर ७ लाख ७६ हजार १९० विद्यार्थिनी आहेत. परीक्षा देण्यासाठी राज्यात एकूण ४ हजार ७२८ परीक्षा केंद्रे आहेत. दरम्यान, एकूण विद्यार्थ्यांपैकी ६४ हजार ४१६ पुनर्परीक्षार्थी आहेत. गेल्या वर्षीच्या तुलनेत विद्यार्थ्यांची संख्या ३८ हजार ६०२ वे वाढली आहे. ही वाढ २.२३ टक्क्यांची आहे.
परीक्षा काळात होणाऱ्या कॉपी प्रकरणांना आळा बसावा, यासाठी प्रत्येक जिल्ह्यात सात याप्रमाणे २५० भरारी पथके नेमण्यात आली आहे. राज्यात अपंग प्रवर्गातून एकूण ७ हजार ४१४ विद्यार्थी परीक्षा देत असून त्यांना सोयीचे परीक्षा केंद्र, वेळेची सवलत, लेखनिक, विषय योजना आदी सवलती देण्यात आल्या आहेत, असे म्हमाणे यांनी सांगितले. दरम्यान, पेपर सुरू होण्याच्या काही मिनिटांपूर्वी प्रश्नपत्रिका फुटून दररोज व्हॉट्स अॅपहून व्हायरल होत आहेत. हा प्रकार रोखण्यासाठी मंडळ आपल्यापरीने प्रयत्न करीत आहेत. मात्र, विद्यार्थ्यांची संख्या आणि परीक्षा केंद्रांची संख्या लक्षात घेता केंद्र संचालक व्हॉट्स अॅपहून पेपर व्हायरल करण्याची शक्यता असू शकते, असे म्हमाणे यांनी सांगितले. या परीक्षेत विद्यार्थ्यांच्या शैक्षणिक गुणवत्तेत वाढ व विकास करण्याच्या दृष्टीने इंग्रजी भाषा विषयाप्रमाणेच मराठी, हिंदी, संस्कृत या भाषा विषयांना कृ‌तिपत्रिका लागू करण्यात आली होती. त्यानुसार यंदाची दहावीची परीक्षा सर्व भाषा विषयांसाठी ‘कृती पत्रिका’ असणारी पहिली परीक्षा राहणार आहे. परीक्षा सुरळीत पार पडण्यासाठी सर्व उपाययोजना करण्यात आल्या आहेत, असे म्हमाणे यांनी सांगितले. दरम्यान, व्हॉट्स अॅपवरून फिरणाऱ्या विविध प्रकारच्या अफवांवर विश्वास ठेऊ नका, असे आवाहन म्हमाणे यांनी केले.
दहावीच्या परीक्षेच्या प्रश्नपत्रिका पेपर सुरु होण्यापूर्वी काही मिनिटांपूर्वी व्हॉट्स अपहून व्हायरल होऊ नये, यासाठी मंड‍ळाने विशेष खबरदारी घेतली आहे. एखाद्या केंद्रांहून संबंधित विषयांची प्रश्नपत्रिका व्हायरल झाल्यास केंद्र प्रमुख आणि केंद्र संचालकांवर कठोर कारवाई करण्यात येईल. तसेच, संबंधित प्रकार करणाऱ्या विद्यार्थ्यांवर देखील कठोर कारवाई करण्यात येईल. लातूर येथील परीक्षा केद्रांवर झालेल्या सामूहिक कॉपी प्रकरणात दोषी आढळणाऱ्या अधिकाऱ्यांवर कारवाई करण्यात आली असून त्यांची बदली करण्यात आली आहे, असे म्हमाणे यांनी सांगितले.
विद्यार्थ्यांसाठी हेल्पलाइन क्रमांक
पुणे - ९४२३०४२६२७
अमरावती - ०७२१ -२६६२६०८
नागपूर - ०७१२ -२५६५४०६, २५५३५०७,२५५३५०३
औरंगाबाद - ९४२२७१५५४६
मुंबई - ०२२ - २७८९३७५६, २७८८१०७५
नाशिक - ०२५३ - २५९२१४३
कोल्हापूर - ०२३१ - २६९६१०१,०२,०३
लातूर - ०२३८२ - २५१६३३
कोकण - ०२३५२ - २२८४८०
....
राज्यस्तर - ०२० -२५७०५२७१, ७२
मोबाइल अॅप डाउनलोड करा आणि राहा अपडेट
