जागतिक महिला दिनाच्या निमित्ताने पुणे महानगर परिवहन महामंडळाने महिलांसाठी गर्दीच्या मार्गावर ‘महिला विशेष बस’ सोडण्याचा निर्णय घेतला आहे. राज्य सरकारकडून पीएमपीच्या ताफ्यात महिला प्रवाशांसाठी ७० तेजस्विनी बस दाखल होणार आहेत. या पार्श्वभूमीवर महिलादिनी महिलांसाठी विशेष सेवा देऊन तेजस्विनी बसची रंगीत तालीम घेतली जाणार आहे.
महिला प्रवाशांना गर्दीच्या मार्गांवर सुरक्षित व आरामदायी प्रवास उपलब्ध व्हावा, या उद्देशाने तेजस्विनी बसचे नियोजन करण्यात आले आहे. या बस ताफ्यात दाखल झाल्यानंतर, त्यांचे नियोजन कसे करावे, यासाठी पीएमपीकडून बुधवारी (आठ मार्च) पुणे व पिंपरी चिंचवडच्या सहा मार्गांवर तेजस्विनी बसच्या धर्तीवर महिला विशेष बस सोडण्यात येणार आहे. सकाळी नोकरी, कॉलेज किंवा व्यावसायानिमित्त बाहेर पडणाऱ्या महिलांसाठी सकाळी आणि सायंकाळी या बस सेवेत असतील.
मार्गांचा सर्व्हे करणार
पीएमपीच्या ताफ्यात येत्या काळात तेजस्विनी बस दाखल होणार आहेत. त्यामुळे या बसचे नियोजन करताना महिला प्रवाशांची गरज आणि मिळणारे उत्पन्न या आधारावर नियोजन करावे लागणार आहे. त्यामुळे बुधवारी महिला विशेष बस सोडण्यात येणाऱ्या सहा मर्गांवर सर्व्हे केला जाणार आहे. महिला प्रवाशांना कोणत्या वेळेला बसची गरज आहे, महिला प्रवाशांची संख्या किती आहे, त्यातून किती उत्पन्न मिळू शकेल, या गोष्टींची पाहणी केली जाणार आहे, अशी माहिती पीएमपीचे वाहतूक व्यवस्थापक अनंत वाघमारे यांनी दिली.
मोबाइल अॅप डाउनलोड करा आणि राहा अपडेट