शास्त्रीय संगीताची अनुभूती देणारा नाट्यसंपदा प्रतिष्ठानतर्फे आयोजित ‘गानसरस्वती महोत्सव’ यंदा १७ ते १९ फेब्रुवारी या कालावधीत होणार आहे. गानसरस्वती किशोरी आमोणकर यांच्या शास्त्रीय संगीतातील अलौकिक योगदानाला मानवंदना देण्यासाठी आयोजित या महोत्सवात यंदा किशोरीताईंसह तबला नवाज उस्ताद झाकीर हुसेन यांचे सादरीकरण आकर्षण ठरणार आहे.
‘राजाराम पुलाजवळील महालक्ष्मी लॉन्स येथे दुपारी ४ ते रात्री दहा या वेळेत महोत्सव होणार आहे. गायन, वादन, नृत्य अशी शास्त्रीय संगीताची अनुभूती रसिकांना या महोत्सवात घेता येणार आहे. ‘गानसरस्वती किशोरी आमोणकर पुरस्कार’ हा सुप्रसिद्ध मृदंग वादक उमयालपुरम शिवरामन यांना व ‘गानतपस्विनी मोगुबाई कुर्डीकर पुरस्कार’ ज्येष्ठ गायिका विदुषी गिरीजा देवी यांना प्रदान करण्यात येणार आहे,’ असे नाट्यसंपदाचे विश्वस्त रघुनंदन पणशीकर यांनी गुरुवारी पत्रकार परिषदेत जाहीर केले.
महोत्सवाची सुरुवात १७ फेब्रुवारी रोजी दुपारी ४ वाजता प्रसिद्ध त्रिचूर बंधू यांच्या कर्नाटक शैलीतील गायनाने होणार आहे. त्यानंतर गायिका स्वर्णिमा गुसैन कला सादर करतील. तसेच धृपद गायकीसाठी प्रसिद्ध असलेल्या गुंदेचा बंधू यांचे गायन होईल. पहिल्या दिवसाचा समारोप ख्यातनाम तबलावादक उस्ताद झाकीर हुसेन यांच्या वादनाने होणार आहे.
शनिवारी सुप्रसिद्ध सतारवादक शाकीर खान आपली कला रसिकांसमोर पेश करतील. त्यानंतर पं. शौनक अभिषेकी यांचे गायन होईल. प्रसिद्ध भरतनाट्यम नृत्य कलाकार विदुषी शोभना यांचा नृत्याविष्कार पाहण्याची संधी रसिकांना मिळणार आहे. दुसऱ्या दिवसाची सांगता डॉ. एन. राजम यांच्या व्हायोलिन वादनाने होईल.
महोत्सवाचे तिसरे सत्र रविवारी सकाळी ९ वाजता असून, या सत्रात किशोरीताईंचा अलौकिक स्वर कानात साठवून घेण्याची अभूतपूर्व संधी रसिकांना साधता येईल. अंतिम सत्राची सुरुवात दुपारी ४ वाजता प्रसिद्ध बासरीवादक पं. प्रवीण गोडखिंडी यांच्या बासरीवादनाने होईल. त्यानंतर पं. रघुनंदन पणशीकर यांचे गायन होईल. महोत्सवाची सांगता ख्यातनाम गायिका विदुषी गिरीजा देवी यांच्या गायनाने होणार आहे.
मोबाइल अॅप डाउनलोड करा आणि राहा अपडेट
