म. टा. प्रतिनिधी, बारामती
बारामती नगरपालिकेची निवडणूक अपेक्षेप्रमाणे राष्ट्रवादी काँग्रेसने बहुमताने जिंकली; मात्र मावळते नगराध्यक्ष योगेश जगताप, तसेच त्यांच्याआधीचे नगराध्यक्ष सुभाष सोमाणी यांना मतदारांनी घरी बसवले. या दोन्ही दिग्गजांचा पराभव ‘राष्ट्रवादी’च्या जिव्हारी लागला असून, अजित पवार यांच्या प्रतिष्ठेलाही धक्का बसला आहे. त्यांच्यासाठी ‘सत्ता आली, पत’ गेली अशी परीस्थिती निर्माण झाली आहे.
बारामती नगरपालिकेत राष्ट्रवादी काँग्रेसची एकहाती सत्ता होती. ती याही निवडणुकीत कायम राहिली आहे. राष्ट्रवादी काँग्रेसच्या पौर्णिमा तावरे यांनी नगराध्यक्षपदाच्या निवडणुकीत भाजपपुरस्कृत आघाडीचे सुनील पोटे यांचा पराभव केला. ‘राष्ट्रवादी’ने ३९ पैकी ३५ जागा जिंकून निर्विवाद वर्चस्व मिळवले. परंतु दोन माजी नगराध्यक्षांच्या पराभवाने ‘राष्ट्रवादी’च्या तंबूत एकच खळबळ उडाली. मावळते नगराध्यक्ष योगेश जगताप यांच्यावर भाजपपुरस्कृत आघाडीचे जयसिंग ऊर्फ बबलू काटे-देशमुख यांनी अवघ्या सात मतांनी मात केली. योगेश जगताप राष्ट्रवादी युवक काँग्रेसचे प्रदेश उपाध्यक्ष होते. तसेच ते पवार कुटुंबीयांच्या निकटवर्तीयांपैकी एक आहेत. जगताप यांनी ज्यांच्याकडून नगराध्यक्षपदाची सूत्रे हाती घेतली होती, त्या सुभाष सोमाणी यांनाही मतदारांनी नाकारले. भाजपपुरस्कृत आघाडीचे सुनील सस्ते यांनी सोमाणी यांचा पराभव केला. या दोन्ही उमेदवारांना पुन्हा पालिकेत पाठवण्यासाठी अजित पवारांनी कंबर कसली होती; मात्र त्यांच्या पराभवामुळे मतदारांनी पवारांच्या कथित बारामती विकास मॉडेलची हवाच काढून घेतली असल्याची चर्चा राजकीय वर्तुळात सुरू आहे.
सोमाणींविरुद्ध मराठा कार्ड चालले
तीन वर्षांपूर्वी अनेक ज्येष्ठांना डावलून सोमाणींना नगराध्यक्षपदाची संधी दिल्याने ‘राष्ट्रवादी’च्या गोटात नाराजीचा सूर होता. पुन्हा सोमाणींना नगरसेवकपदासाठी संधी दिल्याने ‘राष्ट्रवादी’तील गटबाजी उफाळून आल्याने नाराजांनीच सुनील सस्ते यांना मदत केली असल्याचे बोलले जाते. ‘मी सांगेन त्यालाच मराठा समाज मतदान करील,’ असा अजित पवारांना आत्मविश्वास होता. तो फोल ठरल्याने सोमाणी यांना पराभवाचा सामना करावा लागला.
बारामती नगरपालिकेचे नवे सदस्य
नगराध्यक्षा : पौर्णिमा वैभव तावरे (राष्ट्रवादी काँग्रेस)
नगरसेवक :
राष्ट्रवादी काँग्रेस : ज्योती भारत सरोदे, समीर शिवाजी चव्हाण, जय पाटील, अनिता विनोद माने, नीलिमा दीपक मलगुंडे, अभिजित भानुदास जाधव, सुरेखा पांडुरंग चौधर, कमल सतीश कोकरे, बाळासाहेब साधू सातव, आशा दत्तू माने, अतुल आनंदराव बालगुडे, शारदा माणिक बालगुडे, राजेंद्र दत्तात्रय बनकर, अनघा अजिंक्य जगताप, सीमा योगेश चिंचकर, रूपाली दीपक गायकवाड, सूरज दत्तात्रय सातव, संतोष बाळकृष्ण जगताप, सुहासिनी सचिन सातव, कुंदन किशोर लालबिगे, शीतल गणेश गायकवाड, सत्यव्रत अर्जुनराव काळे, सविता सुजित जाधव, नीता अभिजित चव्हाण, संजय वालचंद संघवी, रमेश अण्णा भोकरे, वीणा नितीन बागल, बागवान बेबीमरियम अजीज, बिरजू मांढरे, मयूरी सूरज शिंदे, अश्विनी कुणाल गालिंदे, सचिन सदाशिव सातव, नवनाथ सदाशिव बल्लाळ, सय्यद तरन्नुम अल्ताफ, अनिता दिनेश जगताप
भाजप पुरस्कृत आघाडी : विष्णू तुळशीराम चौधर, जयसिंग अशोक काटे-देशमुख, अशोक नानासाहेब देशमुख, सुनील दादासाहेब सस्ते
मोबाइल अॅप डाउनलोड करा आणि राहा अपडेट