म. टा. प्रतिनिधी, पिंपरी
‘पाचशे आणि एक हजार रुपयांच्या नोटाबंदीच्या केंद्र सरकारच्या निर्णयामुळे सर्वसामान्य नागरिकांचे अतोनात हाल होत आहेत. नोटाबंदीला ९४ टक्के लोकांचा पाठिंबा असल्याचे भाजप सांगत आहे. ही केवळ धूळफेक असून, नोटाबंदीचा निर्णय मोदी सरकारने कोणतीही पूर्वतयारी न करता घेतला आहे. पंतप्रधान नरेंद्र मोदींचा कारभार हुकूमशाही पद्धतीने सुरू आहे,’ अशी टीका पिंपरी-चिंचवड राष्ट्रवादी काँग्रेसचे अध्यक्ष संजोग वाघेरे-पाटील यांनी केली.
या निर्णयातील नियोजनशून्यतेविरोधात पिंपरी-चिंचवड शहर राष्ट्रवादी काँग्रेसने सोमवारी पिंपरीतील डॉ. बाबासाहेब आंबेडकर पुतळा चौकात ‘जनआक्रोश आंदोलन’ केले. त्या वेळी उपमहापौर प्रभाकर वाघेरे, स्थायी समितीचे सभापती डब्बू आसवानी, ज्येष्ठ नगरसेवक हनुमंत गावडे, प्रशांत शितोळे, अजित गव्हाणे, नीलेश पांढारकर, उल्हास शेट्टी, नाना काटे, पंकज भालेकर, नगरसेविका मंदाकिनी ठाकरे, शिक्षण मंडळाचे माजी सभापती फजल शेख, विजय लोखंडे, वर्षा जगताप, सुनील गव्हाणे, आनंदा यादव आदी कार्यकर्ते उपस्थित होते.
‘शेतकरी, कामगार वर्गातील नागरिकांचे बँकेत खाते नाही. त्यामुळे नागरिकांना अनेक अडचणींना सामोरे जावे लागत आहे. पैसे बदलून घेण्यासाठी बँकेच्या रांगेत उभे राहिलेल्या देशभरातील ६० नागरिकांचा मृत्यू झाला असून, त्याची जबाबदारी कोण घेणार,’ असा सवालही वाघेरे यांनी उपस्थित केला.
‘केंद्र सरकारच्या नोटाबंदीच्या निर्णयाला देशभरातील ९४ टक्के लोकांनी पाठिंबा दिला असल्याचे भाजपचे लोक सांगत आहेत. देशभरातील एवढ्या लोकांचा नोटाबंदीला पाठिंबा असता, तर नगरपालिका निवडणुकीत भाजपचा पराभव झालाच नसता,’ असा टोलाही वाघेरे यांनी लगावला.
‘भारत बंद’ला पिंपरीत अत्यल्प प्रतिसाद
पिंपरी : राष्ट्रवादी काँग्रेसने पाठिंबा दर्शवल्यानंतरही ‘भारत बंद’च्या हाकेला पिंपरी-चिंचवडमध्ये अत्यल्प प्रतिसाद मिळाला. केंद्र सरकारचा नोटाबंदीचा निर्णय नियोजनशून्य असल्याचा आरोप करून सोमवारी देशभरातील विविध राजकीय पक्षांनी ‘भारत बंद’ची हाक दिली होती.
पंतप्रधान नरेंद्र मोदी यांनी ५०० आणि १००० रुपयांच्या जुन्या नोटा आठ नोव्हेंबर रोजी चलनातून हद्दपार केल्या. त्यानंतर योग्य नियोजनाअभावी कष्टकरी जनता, कामगार, शेतकरी, व्यापारी, तसेच गृहिणी आणि निवृत्तिवेतनधारकांचे प्रचंड हाल होत असल्याचे सांगून विरोधकांनी सोमवारी ‘भारत बंद’ पुकारला होता; मात्र शहराच्या विविध भागांतील दुकाने, बाजारपेठा सुरळीत सुरू होत्या. एखाद-दुसरे दुकान बंद असल्याचे दिसून आल्याने ‘भारत बंद’ला पिंपरी-चिंचवड शहरात अत्यल्प प्रतिसाद मिळाल्याचे चित्र आहे. कोणताही अनुचित प्रकार घडू नये म्हणून बाजारपेठेत पोलिस तैनात होते.
दरम्यान, या बंदच्या विरोधात बाइक रॅली व निषेध सभेचे आयोजन भाजप कार्यकर्त्यांनी केले. अजमेरा-मासुळकर कॉलनीमधील भाजप पदाधिकारी वीणा सोनवलकर व त्यांच्या कार्यकर्त्यांनी रसरंग चौक, अजमेरा, मासुळकर कॉलनी यशवंतनगर, विठ्ठलनगर, नेहरूनगर, खराळवाडी येथून बाइक रॅली काढली. तसेच चौकाचौकांत सभा घेऊन ‘दुकाने बंद ठेवू नये’ असे आवाहन करण्यात आले. विनोद पाटील, सुभाष फाटक, आकाश जोशी, एच. आर. कांबळे, अभिजित तांबे, सिद्धांत भट, अजय तांबे, विशाल महानवर, सूरज कोळी आदी या वेळी उपस्थित होते.
मोबाइल अॅप डाउनलोड करा आणि राहा अपडेट
