म. टा. प्रतिनिधी, पिंपरी
दर वर्षी शिस्तीचे व परंपरेचे दर्शन घडवणारे राष्ट्रीय स्वयंसेवक संघाचे संचलन यंदा प्रथमच नवीन गणवेशात (फुल पँट) पिंपरी-चिंचवडमध्ये करण्यात आले. पिंपरी-चिंचवड शहरातील पाच ठिकाणांवरून संघाचे पथसंचलन करण्यात आले.
देहू गट (निगडी, चिखली व देहू) हे संचलन सकाळी सात वाजता यमुनानगर येथील ठाकरे मैदान येथे झाले. या वेळी प्रमुख पाहुणे म्हणून रामदास माने उपस्थित होते. या संचलनात २८८ स्वयंसेवकांनी सहभाग घेतला. भोसरी गट (इंद्रायणी, मोशी, आळंदी, भोसरी) हे संचलन सकाळी सात वाजता भोसरी येथील द्वारका विश्व सोसायटीच्या समोर झाले. या कार्यक्रमास प्रमुख पाहुणे प्रा. नामदेव वाळके उपस्थित होते. या वेळी ३११ स्वयंसेवक सहभागी झाले होते. संत तुकारामनगर (संत तुकारामनगर, कासारवाडी, सांगवी, पिंपळे गुरव) हे संचलन सकाळी सात वाजता संत तुकारामनगर येथील नेहरूनगरमधील राजीव गांधी विद्यालय येथे झाले. या वेळी ३०२ स्वंयसेवक सहभागी झाले होते. चिंचवड (पिंपरी, काळेवाडी, चिंचवड, विशालनगर) हे संचलन पिंपरी गावातील सत्यं शिवम सुंदरम सोसायटीसमोर झाले. या वेळी आर. बी. कृष्णानी, तसेच ४४९ स्वयंसेवक सहभागी झाले होते. तर, आकुर्डी (वाकड, हिंजवडी, रावेत आकुर्डी) पथसंचलन आकुर्डी प्राधिकरण येथील गंगानगर बस स्थानकावर घेण्यात आले. या वेळी ३६० स्वयंसेवक, तर प्रमुख पाहुणे म्हणून गंगाराम पटेल सहभागी झाले होते. अशा पाच ठिकाणी एक हजार ७१० स्वयंसेवकानी पथसंचलन व शस्त्रपूजेद्वारे दसरा साजरा केला. या वेळी चौका-चौकात या स्वयंसेवकांचे फुलांची उधळण करून स्वागत करण्यात आले.
विविध धार्मिक कार्यक्रम
पुणे आळंदी रोड वडमुखवाडी येथील साई मंदिरात दसऱ्यानिमित्त विविध धार्मिक कार्यक्रम करण्यात आले. दुपारी बारा वाजता साईंची माध्यान्ह आरती खासदार श्रीरंग बारणे, क क्षेत्रिय कार्यालयाच्या अध्यक्षा शैलजा शितोळे, धर्मवीर संभाजी नागरी सहकारी बँकेचे संस्थापक अध्यक्ष बाबूराव शितोळे, हवेलीचे तहसीलदार दशरथ काळे यांच्या उपस्थितीत झाली. या वेळी साई सेवा प्रतिष्ठानचे अध्यक्ष सुभाष नेलगे यांच्या हस्ते उपस्थितांचा सत्कार करण्यात आला. शिवकुमार नेलगे या वेळी उपस्थित होते. या सोहळ्याची सांगता बुधवारी दुपारी बारा वाजता माध्यान्ह आरतीने होणार आहे. जय भवानी नवरात्र उत्सव मोहननगर येथे देवीची मिरवणूक वाजतगाजत काढण्यात आली.
मोबाइल अॅप डाउनलोड करा आणि राहा अपडेट
