डेंगळे पुलाला पर्यायी पूल उभाण्यास अखेर महापालिकेला मुहूर्त मिळाला असून पुढील आठवड्यापासून या कामाला सुरुवात होणार आहे. डेंगळे पूल वापरण्यास धोकादायक झाल्याने गेल्या काही महिन्यांपासून हा पूल जड वाहनांसाठी बंद करण्यात आला आहे. या पुलामुळे होणारी वाहतुकीची कोंडी सोडविण्यासाठी पर्यायी पूल बांधण्याचा विचार सुरू होता. सोमवारी झालेल्या स्थायी समितीच्या बैठकीत हा पर्यायी पूल उभारण्यास मान्यता देण्यात आली.
शिवाजीनगरकडून रेल्वे स्टेशन, हडपसर, कँटोन्मेंट या भागात ये जा करण्यासाठी डेंगळे पुलाचा वापर केला जातो. या पुलाजवळच जुना बाजार असल्याने तेथे सतत वाहतुकीची कोंडी होते. गेल्या ४३ वर्षांपासून म्हणजे १९७१पासून हा पूल वापरात आहे. हा पूल वापरण्यास धोकादायक झाल्याने येथे पर्यायी पूल उभारावा, अशी मागणी गेल्या अनेक वर्षांपासून या भागातील स्थानिक नगरसेवक अजय तायडे करत होते. दोन वर्षांपूर्वी पालिकेच्या स्थायी समितीने त्यासाठी प्रशासनाकडून अभिप्राय मागविला होता.
डेंगळे पुलाला पर्यायी पूल उभारण्यासाठी माजी स्थायी समितीच्या अध्यक्षा अश्विनी कदम यांनी २०१६-१७च्या बजेटमध्ये १२ कोटी रुपयांची तरतूद केली होती. या पुलासाठी संपूर्ण खर्च १९ कोटी ८१ लाख एवढा येणार असून पुढील एक ते दीड वर्षांत हे काम पूर्ण होणार असल्याचे स्थायी समितीचे अध्यक्ष बाळासाहेब बोडके यांनी सांगितले.
छत्रपती शाहू सेतू
डेंगळे पुलाशेजारी उभारण्यात येणाऱ्या नवीन पुलाला ‘छत्रपती शाहू सेतू’ असे नाव देण्याचा ठराव मंजूर करण्यात आला आहे. या पुलाला छत्रपती शाहू सेतू असे नाव देण्याचा प्रस्ताव नाव समितीमध्ये मान्य करून सर्वसाधारण सभेत मंजुरीसाठी ठेवण्यात आला होता. त्यालाही पालिकेच्या मुख्य सभेने मंजुरी दिल्याचे नगरसेवक तायडे यांनी सांगितले.
मोबाइल अॅप डाउनलोड करा आणि राहा अपडेट
