Prasad.Panse@timesgroup.com
Tweet@prasadpanseMT
पुणे : संभाव्य धोका टाळण्यासाठी पुण्याच्या हवाई हद्दीतील खासगी उड्डाणांवर निर्बंध घालण्यात आले असून, लोहगाव विमानतळाच्या हवाई वाहतूक नियंत्रकाच्या (एटीसी) परवानगीशिवाय कोणत्याही प्रकारचे विमान, हेलिकॉप्टर, ग्लायडर, पॅराग्लायडर आदींचे उड्डाण करता येणार नाही. परवानगीशिवाय उड्डाण केल्यास तो हवाई तळाला धोका समजून त्याला तातडीने गंभीर उत्तर दिले जाईल, असा इशारा हवाई दलातर्फे देण्यात आला आहे.
हवाई दलाच्या लोहगाव येथील तळाच्या प्रमुखांच्या वतीने वरिष्ठ नियंत्रण अधिकाऱ्यांनी याबाबतचा आदेश जारी केला असून, त्याची प्रत ‘महाराष्ट्र टाइम्स’ला उपलब्ध झाली आहे. लोहगावचा तळ हा हवाई दलाच्या प्रमुख तळांपैकी एक आहे. तेथून देशांतर्गत व आंतरराष्ट्रीय नागरी उड्डाणेही होत असतात. त्यामुळे येथे हवाई दलाच्या अत्याधुनिक विमानांसोबतच नागरी वाहतूक कंपन्यांची विमानेही उभी असतात. उरी येथील दहशतवादी हल्ला आणि त्यापाठोपाठ पाकव्याप्त काश्मीरमध्ये झालेल्या सर्जिकल स्ट्राइकनंतर देशभरातील लष्करी संस्थांना हाय अलर्ट जारी करण्यात आला आहे. या पार्श्वभूमीवर लोहगाव हवाई तळाबाबत आदेश देण्यात आला आहे. उड्डाणासाठी ठरवून दिलेला मार्ग व अन्य निकषांचेही काटेकोर पालन करण्याचा इशाराही देण्यात आला आहे.
‘यापुढे परवानगीशिवाय कोणतेही उड्डाण केल्यास किंवा ठरवून दिलेल्या मार्गाशिवाय हवाई तळाच्या जवळपास उड्डाण केल्यास तो हवाई तळाला धोका समजण्यात येईल. त्याचबरोबर तातडीने गंभीर पावलेही उचलण्यात येतील,’ असे या आदेशात म्हटले आहे. शिर्डी विमानतळ, हडपसर येथील ग्लायडिंग सेंटर यांसह या परिसरात अनेक बड्या उद्योजकांची खासगी हेलिपॅड आहेत. त्यावरून नियमित उड्डाणे सुरू असतात. या सर्व हेलिपॅड किंवा विमानतळांच्या, तसेच फ्लाइंग क्लबच्या व्यवस्थापकांना या आदेशाची माहिती देण्यात आली आहे.
ड्रोनवर बंदी
गेल्या काही दिवसात राजस्थान आणि पंजाबच्या पाकिस्तानलगतच्या सीमेकडील भागात काही फुगे आढळले होते. तसेच मुंबईच्या आकाशातही काही दिवसांपू्र्वी संदिग्ध फुगे दिसल्याची तक्रार वैमानिकाने केली होती. त्या पार्श्वभूमीवर मुंबईत ड्रोन, पॅराग्लायडिंग आणि रिमोटने चालणारी हलकी किंवा खेळण्यातली विमाने उडविण्यास बंदी घालण्यात आली आहे. त्याचे उल्लंघन केल्यास गुन्हा दाखल केला जाईल, असा आदेश मुंबई पोलिसांनी काढला आहे. त्या पार्श्वभूमीवर हवाई दलाच्या पुण्यातील तळातर्फेही असे आदेश काढण्यात आले आहेत.
मोबाइल अॅप डाउनलोड करा आणि राहा अपडेट