म. टा. प्रतिनिधी, पुणे
'पारंपरिक शिक्षणात मोठी ताकद असली, तरी शिक्षकांनी नवतंत्रज्ञान आत्मसात करणे गरजेचे आहे. आपल्याकडे असलेली युवाशक्ती आणि झपाट्याने विकसित होणारे तंत्रज्ञान यामुळे पुढील दहा-पंधरा वर्षांत भारतीयांना मोठ्या संधी आहेत. त्याचा योग्य लाभ घ्यायचा असल्यास समर्पण आणि संशोधक वृत्तीच्या शिक्षकांची फळी तयार होणे आवश्यक आहे,' असे प्रतिपादन पहिल्या नॅशनल टीचर्स काँग्रेसचे अध्यक्ष आणि ज्येष्ठ अणुशास्त्रज्ञ डॉ. अनिल काकोडकर यांनी केले.
माईर्स एमआयटी स्कूल ऑफ गव्हर्नमेंटतर्फे (मिटसॉग) आयोजित पहिल्या नॅशनल टीचर्स काँग्रेसच्या समारोपात डॉ. काकोडकर बोलत होते. या वेळी दिग्दर्शक सिद्धार्थ बसू, ज्येष्ठ कम्प्युटरतज्ज्ञ डॉ. विजय भटकर, माजी कसोटीपटू चंदू बोर्डे, खासदार डॉ. नरेंद्र जाधव, दलित इंडियन चेंबर ऑफ कॉमर्स अँड इंडस्ट्रीजचे संस्थापक अध्यक्ष मिलिंद कांबळे, ज्येष्ठ शास्त्रज्ञ डॉ. सुहास सुखात्मे, आयआयटी मद्रासचे माजी संचालक डॉ. आर. नटराजन, माईर्स एमआयटीचे अध्यक्ष डॉ. विश्वनाथ कराड, प्रा. राहुल कराड, प्रा. प्रकाश जोशी आदी उपस्थित होते. डॉ. काकोडकर यांच्या हस्ते शिक्षण क्षेत्रातील भरीव कामगिरीबद्दल डॉ. आर. नटराजन आणि डॉ. सुहास सुखात्मे यांना 'जीवनगौरव पुरस्कार' देऊन सन्मानित करण्यात आले.
डॉ. काकोडकर म्हणाले, 'गुणवत्ता वाढविण्यासाठी अनेक कॉलेजांना स्वायत्तता दिली जात आहे. त्याच्या चाचणीसाठी प्रमाणपद्धती अंमलात आणली पाहिजे. विद्यार्थ्यांमध्ये स्पर्धात्मक दृष्टिकोन विकसित करण्यासाठी शिक्षकांनी प्रयत्न करावेत. त्यासाठी शिक्षणसंस्थांनी ज्ञान देण्यासह आर्थिक स्रोत उभारण्याला प्राधान्य द्यावे. सरकार किंवा उद्योग क्षेत्राकडून हे स्रोत उपलब्ध होऊ शकतील. शिक्षकांनी आपल्यामध्ये समर्पण आणि संशोधक वृत्ती जोपासायला हवी. त्यांनी नावीन्यपूर्ण संशोधन विकसित करण्यावर भर दिला पाहिजे. इतर देशांच्या तुलनेत आपल्याकडे शिक्षकांना मिळणारे वेतन, संशोधन व विकास यावर होणारा खर्च अधिक आहे. त्यामुळे याचा फायदा शिक्षकांनी उठवायला हवा. आपण जे वेतन घेतो, त्याच्या बदल्यात काय देतो, याचाही विचार व्हावा.'
डॉ. नटराजन, डॉ. सुखात्मे यांनीही सत्काराला उत्तर देताना आपले मनोगत व्यक्त केले. नीलम शर्मा, गौतम बापट यांनी सूत्रसंचालन केले.
मोबाइल अॅप डाउनलोड करा आणि राहा अपडेट
