टीम मटा
मराठा समाजाच्या मोर्चामध्ये सहभागी होण्यासाठी जिल्हा-उपनगरातून पुणे शहराकडे अनेकांनी रविवारी मार्गक्रमण केले. जिल्हा-उपनगरातून मोठ्या संख्येने लोक मोर्चामध्ये सहभागी झाले. विविध संस्था, संघटनांतर्फे मोर्चामध्ये पाणीवाटप आणि विविध प्रकारची मदत करण्यात आली.
कात्रज : धनकवडी, कात्रज, आंबेगाव परिसरासह जिल्ह्यातील भोर, वेल्हा व शिरवळ पर्यंतच्या महामार्गालगतच्या गावागावांतील मराठा बांधव, महिला, युवकांनी मार्चाच्या दिशेने जाण्यासाठी सातारा रस्ता बीआरटी मार्ग रविवारी व्यापला होता. भारती विद्यापीठ परिसरातील महापालिका आवारात आंबेगाव, जांभूळवाडी रस्ता, दत्तनगर, आंबेगाव पठार, चंद्रभागानगर, भारती विद्यापीठ परिसरातील नागरिक एकत्र आले. शिवाजी महाराजांच्या पुतळ्याला पुष्पहार अर्पण करून दुचाकी रॅलीने मुख्य मोर्चाकडे जाण्यासाठी सर्व जण मार्गस्थ झाले. धनकवडीतील जानुबाई मंदिरात तळजाई पठार, धनकवडी गाव, आंबेगाव पठार, मोहननगर, गुलाबनगर, चैतन्यनगर परिसरातील नागरिक जमा झाले. आरतीनंतर शेवटच्या बसथांब्यापासून दुचाकीने मोर्चाकडे निघाले. बालाजीनगरसह काशिनाथ पाटीलनगर, पुण्याईनगर, श्रीधरनगर, शंकर महाराज मठ परिसरातील दुचाकी रॅली शहराकडे निघाली. कात्रज, संतोषनगर गुजर-निंबाळकरवाडी, मांगडेवाडी, भिलारेवाडीसह कात्रज-कोंढवा रस्ता परिसरातील नागरिक मोठ्या प्रमाणात कात्रज चौक परिसरात जमा झाले. दुचाकीने मोर्चाकडे निघाले. शहराबाहेरून खासगी बस, स्कूल बस, ट्रक, टेम्पो या वाहनांनी सकाळी आठ वाजल्यापासूनच शहराकडे येण्यास सुरुवात केली होती. भगवे झेंडे, टी-शर्ट, टोप्या परिधान करून युवक महिलांसह ज्येष्ठांनी मार्चात उत्साहाने सहभाग घेतला. ठिकठिकाणी पिण्याच्या पाण्याची व्यवस्था करण्यात आली होती. सातारा रस्त्यावरील प्रत्येक चौकात वाहतूक पोलिस व स्थानिक पोलिस व स्वयंसेवक मार्गदर्शन करीत होते. मार्केट यार्ड, शिंदे हायस्कूल, मुक्तांगण, लक्ष्मीनारायण, गणेश कला क्रीडा, शिवाजी मराठा हायस्कूल येथे सातारा रस्त्यावरून मुख्य मोर्चाकडे येणाऱ्यांना वाहनतळाची व्यवस्था करण्यात आली होती. मार्केट यार्डवरून नेहरू रस्त्याने सेव्हन लव्हज चौकाकडे विधानभवनकडे मोठ्या संख्येने नागरिक मोर्चामध्ये सहभागी होते.
आळंदीतून अनेकांचा सहभाग
आळंदी : मराठा क्रांती मूक मोर्चाच्या नियोजनपूर्व आढावा बैठकीत केलेल्या नियोजनाप्रमाणे आळंदीतून नागरिक, महिला, पदाधिकारी युवकांनी मोठा सहभाग नोंदविला. शेकडो वाहनांतून हजारो मराठा समाज बांधव सहभागी झाले. आळंदी परिसरातील इतर समाजाचे नागरिक-पदाधिकारी आणि अलंकापुरी प्रतिष्ठानचे कार्यकर्ते मावळ्यांची वेशभूषा करून मराठा मूक मोर्चात सहभागी झाले.
आळंदी शहर परिसरातून शनिवारी कार्यकर्त्यांनी दुचाकी रॅली काढली. यात परिसरातील युवक मोठ्या संख्येने सहभागी झाले होते. आळंदीत या मोर्चाच्या नियोजनासाठी महिला-पुरुष, युवक-युवती, पदाधिकारी स्तरावर बैठका झाल्या. मराठा समाजातील विविध समस्या आणि त्यावर उपाययोजनांसाठी अनेक तरुण कार्यकर्ते नियोजनात पुढे आले. मूक मोर्चात सहभागी होण्यासाठी आळंदी नगरपरिषद चौकातील छत्रपती शिवाजी महाराज यांच्या पुतळ्यास अलंकापुरी प्रतिष्ठानच्या कार्यकर्ते यांनी पुष्पहार अर्पण करून अभिवादन केले. सकाळी साडेसात वाजता पुण्याकडे नागरिक रवाना झाले. पुण्यात अलका चौकातून या मोर्चात नागरिक सहभागी झाले. दुचाकी रॅलीने जनजागृती करून मोर्चात सहभागी होण्याकडे नागरिकांचे लक्ष वेधण्यात आले. स्वच्छता दूत म्हणूनही अनेकांनी काम केले.
मराठा क्रांती मूक मोर्चामधील सहभागी झालेल्या नागरिकांना मुस्लिम ख्रिचन एकता मंचाच्या वतीने रास्ता पेठेमधील कादर चौकाजवळील होली एंजल चर्चजवळ पिण्याच्या पाण्याच्या बाटल्याचे वाटप करण्यात आले. या कार्यक्रमाचे संयोजक मुस्लिम समाजाचे नेते अॅड. अय्युब शेख, ख्रिश्चन समाजाचे नेते एडविन रॉबर्ट्स, मोझेस कलकोटी, नितीन डिसोझा, विकास उमापती, आल्फ्रेड अँथोनी, अॅड. रवी शिंदे, मुस्ताक पटेल, जेवियर मरियन आदी उपस्थित होते.
मोबाइल अॅप डाउनलोड करा आणि राहा अपडेट
