Chaitrali.Chandorkar@timesgroup.com
Tweet : @chaitralicMT
पुणे : जगाच्या पाठीवर कुठेही गेलो, तरी प्रत्येकाच्या मनात आपल्या जन्मगावाविषयी ओढ असते. तेथील संस्कृती, समाजजीवनाशी आपल्या अनेक आठवणी जोडलेल्या असतात. काही कारणाने जन्मगावाशी दुरावा निर्माण झाला, तरी तिथे जाण्याची मनातील इच्छा मात्र कमी होत नाही. जन्माने पुणेकर, मात्र सध्या स्वीडनचा नागरिक असलेला श्रीकांत वॉर्ड हा तरुण यंदा अशाच ओढीने गणेशोत्सवासाठी थेट स्टॉकहोमहून पुण्यात दाखल झाला आणि त्याने उत्सवाचा मनसोक्त आनंदही लुटला.
श्रीकांतचा जन्म पुण्यातच झाला; मात्र स्वीडनमधील एका कुटुंबाने त्याला लहानपणीच दत्तक घेतले. त्यामुळे तो त्या देशाचा रहिवासी झाला; पण आपल्या जन्मगावाबद्दलची ओढ काही त्याला स्वस्थ बसू देत नव्हती. शिवाय गणपती हा त्याचा आवडता देव. त्यामुळे पुण्यातील गणेशोत्सव पाहायला यायचे स्वप्नच त्याने बाळगले होते. यंदा त्याने ते पूर्ण केले. सध्या श्रीकांत तिकडे राजकीय क्षेत्रात मोठ्या पदावर कार्यरत आहे.
'कळत नसलेल्या वयात मी तिकडे गेलो; पण समजायला लागल्यापासून मला भारताबद्दल आणि जन्मगाव असलेल्या पुण्याबद्दल कुतूहल होते. पुण्यात असतो तर कसा वाढला असतो, असा विचार मी नेहमी करायचो. येथील परंपरा, जीवनपद्धतीबद्दल अनेक प्रश्न पडत होते. शिक्षण आणि करिअर मार्गी लागल्यावर एकदा पुण्यात जायचे असे ध्येय मी ठेवले होते,' असे सांगताना श्रीकांत भावनिक झाला होता.
'गणपती हा माझा लाडका देव. पुण्यातील गणेशोत्सवाबद्दल खूप वाचले होते. त्यामुळे उत्सवात पुण्यात निवांतपणे मुक्काम ठोकण्याचे नियोजन केले होते. त्याप्रमाणे मी गणेशोत्सव अनुभवला असून, तो अविस्मरणीय ठरला आहे. त्याबद्दल मी पुस्तकही लिहायचे ठरवले आहे. स्वीडनबद्दल मला अभिमान नक्कीच आहे; पण भारताबद्दलही मला तेवढाच आदर आहे. मी रामायण, महाभारत, श्रीकृष्ण, हिंदू परंपरा आदींबद्दलची पुस्तके सतत वाचतो. स्टॉकहोममध्ये वास्तव्यास असलेल्या भारतीयांच्याही मी संपर्कात आहे. त्यांच्याकडून मला नवनवीन माहिती मिळत असते,' असेही श्रीकांतने आवर्जून सांगितले.
गेल्या दहा दिवसांत श्रीकांतने मानाच्या गणपतींसहते शहरातील सर्व प्रसिद्ध गणपतींचे दर्शन घेतले. एवढेच नव्हे, तर दोन दिवस विसर्जन मिरवणुकीतही तो उत्साहाने सहभागी झाला. गणेश मंडळांनी साकारलेले भव्य देखावे, देहभान विसरून पारंपरिक वाद्ये वाजवणारी पथके, आकाशाला गवसणी घालू पाहणारे ध्वज आणि लहानांपासून ज्येष्ठांपर्यंत सर्व वयोगटांतील नागरिकांचा उत्साह पाहून तो भारावला. आपण याच संस्कृतीत जन्माला आलो, या अभिमानाने त्याची छाती फुलून आली. गणेशोत्सवाच्या आनंदयात्रेविषयीचे भरभरून वर्णनही त्याने सोशल नेटवर्किंग साइटवरून केले आहे. एवढेच नव्हे, तर पुढच्या वर्षी पत्नी आणि मुलीलाही हा उत्सव दाखवण्याचा निर्णय त्याने घेतला आहे.
पोटासाठी भटकत जरी दूर देशी फिरेन,
मी राजाच्या सदनी अथवा घोर रानी शिरेन,
नेवो, नेते जड तनूस या दूर देशास दैव
राहो चित्ती प्रिय मम परी जन्मभूमी सदैव...
या जुन्या कवितेच्या ओळी आपल्याला ज्ञात आहेत. श्रीकांत यांची गोष्ट वाचल्यानंतर या ओळी मनाला आणखीच भिडतात.
..........
'लवकरच मराठीत लेखन'
श्रीकांतच्या पत्नीलाही भारताबद्दल आकर्षण आहे. 'आम्ही आमच्या मुलीला बियांका आणि इंदिरा अशी दोन नावे ठेवली आहेत. मराठी माणसांबद्दल अधिक जाणून घेण्यासाठी सध्या मी मराठी भाषाही शिकतो आहे. तिकडे एक मराठी शिक्षिका सध्या मला बोलायला शिकवत आहेत. लवकरच मी मराठीत लेखनही करीन,' असे श्रीकांतने अभिमानाने सांगितले.
मोबाइल अॅप डाउनलोड करा आणि राहा अपडेट
