सांस्कृतिक देवाणघेवाणीअंतर्गत पुण्यात दाखल झालेल्या परदेशी विद्यार्थ्यांनी उत्साहात गणेशोत्सव विसर्जन मिरवणुकीत सहभाग नोंदवला. गणेशोत्सव म्हणजे काय, त्यावेळी परिधान करण्यात येणारे पारंपरिक पेहराव आदींची पुरेशी माहिती घेऊन त्यांनी उत्सवाचा आनंद लुटला. अंबाडा घालून, त्यावर गजरा माळून, नऊवारी साडी नेसून, नाकात नथ घालून अमेरिकेची अॅना शोल्झ कार्लसन लक्ष्मी रस्त्यावरील मिरवणुकीचा पुरेपूर आनंद घेत होती. 'इतक्या भव्य प्रमाणावर एखाद्या देवाची केली जाणारी पूजा आणि त्याचा इतका नयनरम्य सोहळा माझ्यासाठी मोठा आनंददायी आहे. नऊवारी साडी नेसून सुरुवातीला थोडे अवघडल्यासारखे वाटले, मात्र सवयीचे झाल्यानंतर ढीगभर फोटो काढले,' अॅना सांगत होती. ब्राझीलचा आंद्रे लुकास म्हणाला, की 'आमच्याकडे होणारे कार्निव्हल आणि गणेशोत्सवात मला प्रचंड साम्य आढळते. इंटरनेटवरून माहिती घेतलेले येथील ढोलवादन प्रत्यक्ष पाहून मी प्रचंड खूश झालो. मी स्वतःला नाचण्यापासून थांबवू शकलो नाही. मला दरवर्षी गणेशोत्सवात पुण्यात यायला आवडेल. उत्सवाचा एकूणच डामडौल पाहता, मला सेलिब्रेटी असल्याचेच वाटत आहे.' वेस्ली डॉमनिक रोझा ऑलिव्हिएरा या ब्राझिलच्या विद्यार्थिनीला इंडियन बर्गर (वडा पाव) प्रचंड आवडला, तर अँडर्स गॉर्डनने पांढरा सलवार - कुर्ता आणि भगवा फेटा विकत घेऊन घरी नेण्याचे ठरवले आहे. या दोघांनीही केवळ मिरवणुकीसाठी 'गणपती बाप्पा मोरया, मंगलमूर्ती मोरया' हा जयजयकार शिकून घेतला.
...
..नथ नाकात नव्हे कानात
नथ हा अगदी खास मराठमोळा दागिना. तो नाकात घालायचा असतो, याची कल्पना नसलेल्या एका मेक्सिकन तरुणीने नथ चक्क कानात घातली होती. तिला हे एक प्रकारचे 'पिअर्सिंग'च वाटले; पण तिची ही वेगळी स्टाइल चर्चेचा विषय ठरली होती
मोबाइल अॅप डाउनलोड करा आणि राहा अपडेट
