अकरा दिवसांच्या बाप्पांना निरोप देण्यासाठी काल, गुरुवारी निघालेल्या विसर्जन मिरवणुका २४ तासांनंतर आजही सुरू आहेत. पुण्यातील मानाच्या सर्व गणपतींचे गुरुवारी सायंकाळपर्यंत विसर्जन झाले असले तरी दगडूशेठ हलवाईसह अन्य गणपतींच्या मिरवणुका मात्र रात्रभर सुरू होत्या. दगडूशेठ हलवाई गणपतीचे आज सकाळी सव्वाआठच्या सुमारास विसर्जन झाले. पुण्यात सुमारे १३३ मोठ्या मंडळांच्या गणेशमुर्तींचे आतापर्यंत विसर्जन झाले आहे.
गणेशोत्सवाचे जनक लोकमान्य टिळक यांच्या महात्मा फुले मंडईतील पुतळ्याला पुष्पहार अर्पण करून पुण्याचे पालकमंत्री गिरीश बापट आणि महापौर प्रशांत जगताप यांनी मानाच्या पहिल्या श्री कसबा गणपतीची आरती केली. त्यानंतर, गणपती बाप्पा मोरया, पुढच्या वर्षी लवकर या अशा जयघोषात विसर्जन मिरवणुकीला गुरुवारी सकाळी साडेदहा वाजता सुरुवात झाली. बुधवारी रात्री शहरात जोरदार पाऊस झाला होता, तर गुरुवारी सकाळपासूनही रिमझिम पाऊस सुरू होता. तरीही, लाडक्या बाप्पांच्या दर्शनासाठी पुणेकरांनी गर्दी केली होती. कसबा गणपतीपाठोपाठ, तांबडी जोगेश्वरी मंडळ, गुरुजी तालीम मंडळ, तुळशीबाग सार्वजनिक गणेशोत्सव मंडळ आणि केसरीवाडा ही मानाची इतर मंडळे मुख्य मिरवणुकीत दाखल झाली. मानाच्या गणपतींनंतर लक्ष्मी रस्ता आणि शिवाजी रस्त्यावरील इतर मंडळे मिरवणुकीत सहभागी झाली.
मानाच्या गणपतींचे विसर्जन झाल्यानंतरही पुण्यात रात्रभर मिरवणुकांचा गजबजाट राहिला. बाजीराव रस्ता, शिवाजी रस्ता, टिळक रस्ता मिरवणुकांनी गजबजलेला आहे. विसर्जन घाटांवरील गर्दीही कायम आहे. अलका चौकात पोलिसांकडून डीजे बंद करण्याचा प्रयत्न झाल्याने काहीवेळ तणाव निर्माण झाला होता तर बॅरिकेट्स लावल्यामुळे केळकर रोडवरची बरीच मंडळे महापौरांकडून नारळ न घेताच टिळक चौकातून लाकडी पुलाकडे रवाना झाली. बाबू गेनू आणि भाऊ रंगारी मिरवणुकीत दोन ते अडीच तासांचा 'गॅप' पडल्यानेही काहीशी रखडपट्टी झाली. पोलिसांच्या हस्तक्षेपानंतर टिळक रस्त्यावरील मिरवणूक जलदगतीने पुढे सरकली. या रस्त्यावरून आतापर्यत ८६ मंडळे मार्गस्थ झाली आहेत. एकूण १५३ मंडळांची नोंदणी पाहता अजून मोठ्या प्रमाणात मंडळांचे गणपती बाकी आहेत. एकूणच पुण्यात दुपारपर्यंत मिरवणुका चालण्याची शक्यता आहे.
दगडूशेठ गणपती मिरवणूक रखडली
दगडूशेठ गणपती उशिराने बेलबाग चौकात आला. त्यामुळे टिळक चौकात पोहोचण्यास दरवर्षीच्या तुलनेत मोठा विलंब झाला. दरवर्षी पहाटे सहाच्या सुमारास दगडूशेठ गणपती टिळक चौकात येतो. यंदा ७.३० च्या सुमारास दाखल झाला. सव्वाआठच्या सुमारास विसर्जन झाले. श्रींची मूर्ती गणनायक रथामध्ये विराजमान होती. लक्ष लक्ष दिव्यांनी उजळून निघालेल्या या रथाने व त्यातील विलोभनीय मूर्तीने नागरिकांच्या डोळ्याचे पारणे फेडले. श्रींचे रूप व रथाचा डौल डोळ्यात व मोबाइलमध्ये साठवून घेण्यासाठी नागरिकांची झुंबड उडाली.
मोबाइल अॅप डाउनलोड करा आणि राहा अपडेट
