- नऊ हजार पोलिस बंदोबस्तासाठी तैनात
- नियमांचे पालन करण्याच्या मंडळांना सूचना
म. टा. प्रतिनिधी, पुणे
'पुणे व पिंपरी चिंचवड शहरात गणेश उत्सवर शांततेत पार पाडण्यासाठी पुणे पोलिस सज्ज झाले आहेत. साडेचार हजार सार्वजनिक मंडळे गणेशाची स्थापना करणार आहेत. गणेशोत्सव काळात नऊ हजार पोलिसांचा चोख बंदोबस्त राहणार असून, आवाजाची मर्यादा ओलांडणाऱ्या गणेश व ढोल ताशा मंडळांवर गुन्हे दाखल केले जातील. गणेश प्रतिष्ठापनेच्या दिवशी पहिल्यांदाच प्रमुख गणेशमंडळाच्या मिरवणुकीसाठी 'जीपीएस सिस्टम'चा वापर केला जाणार आहे,' अशी माहिती पोलिस आयुक्त रश्मी शुक्ला यांनी पत्रकार परिषदेत दिली.
गणेश उत्सवातील नियोजन व बंदोबस्त याची माहिती शुक्ला यांनी शनिवारी पत्रकारांना दिली. या वेळी सहआयुक्त सुनील रामानंद, अतिरिक्त आयुक्त सी. एच. वाकडे व इतर वरिष्ठ अधिकारी उपस्थित होते.
शुक्ला यांनी सांगितले, 'पुण्यात होणारा गणेशोत्सव हा राज्यात मानाचा समजला जातो. ५ सप्टेंबर ते १५ सप्टेंबर या दरम्यान होणाऱ्या गणेश उत्सवाचे नियोजन करण्यात आले आहे. त्यासाठी गणेश मंडळ, ढोल-ताशा पथक मंडळे यांच्याशी बैठका घेण्यात आल्या आहेत. चार हजार ४१९ मंडळ गणेश मंडळे गणेशाची प्राणप्रतिष्ठा करणार असून, त्यामध्ये वाढ होऊ शकते. गणेश मंडळाच्या पदाधिकाऱ्यांचा व्हॉट्स अॅप ग्रुप तयार केला असून, त्यावरून त्यांच्याशी संपर्क ठेवला जात आहे.' '५ सप्टेंबर रोजी गणेशाची प्राणप्रतिष्ठा होणार आहे. त्यामुळे मूर्ती खरेदीसाठी मोठी गर्दी होते. हे लक्षात घेऊन परिसरातील वाहतूक बंद केली जाणार आहे. पोलिसांकडून विर्सजन घाटांची पाहणी करण्यात आली आहे. गणेश उत्सवासाठी ११३ सीसीटीव्ही कॅमेरे बसविण्यात आले आहेत. तर विसर्जन मार्गावर २६ कॅमेरे बसविले आहेत. शांत व सुरक्षितपणे गणेश उत्सवर पार पाडण्यासाठी पोलिसांकडून चोख तयारी करण्यात आली आहे. नागरिकांनी संशयास्पद वस्तू किंवा व्यक्ती आढळून आल्यास तत्काळ पोलिसांना कळवावे,' असे आवाहन शुक्ला यांनी केले.
...
नऊ हजार पोलिस तैनात
गणेशोत्सव सुरक्षित व शांततेत पार पाडण्यासाठी नऊ हजार पोलिसांचा बंदोबस्त राहणार आहे. यामध्ये दोन अतिरिक्त पोलिस आयुक्त, १६ पोलिस उपायुक्त, ४० सहायक पोलिस आयुक्त, १७० पोलिस निरीक्षक, ६०० सहायक व उपनिरीक्षक, आठ हजार कर्मचारी, पाचशे होमगार्ड आणि राज्य राखीव पोलिस दलाच्या तीन कंपन्यांचा बंदोबस्तामध्ये सहभाग राहणार आहे.
....
पहिल्यांदाच 'जीपीएस' सिस्टीम
'गणेश मंडळाच्या प्राणप्रतिष्ठा मिरवणुकीत पोलिसांकडून पहिल्यांदाच 'जीपीएस' सिस्टीम राबविली जाणार आहे. महत्त्वाच्या गणपतींच्या मिरवणुकीमध्ये अडथळा निर्माण होऊ नये, पुढची आणि मागची वाहतूक सुरळीत चालावी म्हणून 'जीपीएस' सिस्टीमचा वापर केला जाणार आहे. गणेशाच्या रथाला जीपीएस डिव्हाइस जोडले जाणार आहे. त्याचे मॉनिटरिंग पोलिसांमार्फत केले जाणार आहे. त्यामुळे मिरवणुकीचे नेमके 'लोकेशन' पोलिसांना समजणार आहे. दोन मिरवणुका एकमेकांना आडव्या येणार नाहीत, तसेच गर्दीमुळे अडथळा होणार नाही याचीही दक्षता या 'जीपीएस'मुळे घेणे सोपे जाणार आहे. पुण्यामध्ये पहिल्यांदाच हा प्रयोग राबवण्यात येत असूनस मंडळांच्या पदाधिकाऱ्यांशी चर्चा करुन हा निर्णय घेण्यात आलेला आहे,' अशी माहिती पोलिस उपायुक्त सुधीर हिरेमठ यांनी दिली.
..
गिव्ह वे टू अॅम्ब्युलन्स योजना सुरू
उत्सवाच्या पार्श्वभूमीवर अॅम्ब्युलन्सला जाण्यासाठी मार्ग करून देणारी 'गिव्ह वे टू अॅम्ब्युलन्स' ही योजना वाहतूक शाखेने सुरू केली आहे. वाहतूक नियंत्रण कक्षात ८४९१८००१०० क्रमांक ठेवण्यात आला आहे. हा क्रमांक सर्व हॉस्पिटलमध्ये देण्यात आला आहे. या क्रमांकावर फोन केल्यास वाहतूक नियंत्रण कक्षातील कर्मचारी अम्ब्युलन्स जाणाऱ्या मार्गावर पुढील वाहतूक कर्मचाऱ्यांशी संपर्क साधून तातडीने मार्ग मोकळा करून देतील. या योजनेसाठी फलक तयार केले असून उत्सवामध्ये त्याचे फलक लावण्यात येणार आहेत. 'अॅम्ब्युलन्सचा सायरन म्हणजे रुग्णाची हाक असे समजून वाहनाची गती कमी करा. रोडच्या डाव्या बाजून वाहने सावकाश चालवा. रस्त्याच्या उजव्या बाजूने अब्म्युलन्ससाठी रोड मोकळा करून द्यावा,' असे आवाहन वाहतूक शाखेचे उपायुक्त डॉ. प्रवीण मुंढे यांनी केले.
...
मंडळांसाठी मार्गदर्शक सूचना
गणेश मंडळांनी धर्मादाय आयुक्तांकडे नोंदणी करावी, हायकोर्ट व सुप्रीम कोर्ट यांच्या आदेशाचे पालन करावे. प्रत्येक मंडळाने चोवीस तास कमीत कमी दहा स्वयंसेवक नेमावेत. मंडळाच्या समोर सीसीटीव्ही कॅमेरे बसवावे. गर्दी नियंत्रण करण्यासाठी स्वयंसेवकांनी पोलिसांना मदत करावी. तर, नागरिकांनी देखील काही स्वतःची काळजी घ्यावी. गर्दीमध्ये येताना मौल्यवान वस्तू घालून येणे टाळावे. लहान मुलांची काळजी घ्यावी. बेवारस वस्तू आढळून आल्यास तत्काळ पोलिसांना कळवावे.
...
आवाजाची चाचणी होणार
गणेश उत्सवामध्ये १०, ११, १२, १३ आणि १५ तारखेला रात्री बारापर्यंत वाद्य वाजविण्यास परवानगी आहे. मात्र, बारापर्यंत परवानगी असली तरी कोर्टाने आवाजाची मर्यादा आखून दिलेली आहे. त्या मर्यादेपेक्षा जास्त आवाज आढळून आल्यास त्या मंडळावर ध्वनिप्रदूषण प्रतिबंधक कायद्यानुसार गुन्हा दाखल केला जाईल. नागरिकांनी जास्त आवाज असल्याची तक्रार केल्यास पोलिस अधिकारी त्या ठिकाणी जाऊन आवाजाची चाचणी घेतील. त्यात तथ्य आढळून आले, तर संबंधित मंडळावर कारवाई केली जाईल.
...
नियमभंग केल्यास ढोल-ताशा पथकांवर गुन्हे
गणेश मंडळासमोर वाजविण्यासाठी संबंधीत ढोल-ताशा पथकाला परवानगी घेणे आवश्यक आहे. परवानगी शिवाय त्यांना मंडळासमोर वाजविता येणार नाही. ढोल व ताशांची नेमून दिलेल्या संख्येपेक्षा जास्त आढळून आले व आवाजाची मर्यादा पाळली नाही तर ध्वनिप्रदूषण प्रतिबंधक कायद्यानुसार गुन्हा दाखल करण्यात येईल, अशी माहिती पोलिस उपायुक्त सुधीर हिरेमठ यांनी दिली.
...
स्वागत कक्षांना बंदी
गणेश विसर्जन मिरवणूक मार्गावर उभारण्यात येणाऱ्या स्वागत कमानींना बंदी घालण्यात आली आहे. विघ्नहार्ता न्यास व महापालिकेच्या स्वागत कक्षांना परवानगी आहे.
...
- दहा हजार पोलिसांचा बंदोबस्त
- साडेचार हजार सावर्जनिक मंडळे गणेशाची स्थापना करणार
- १३ ठिकाणी अॅम्ब्युलन्सची सोय
- सात चौकात अनाउन्सिंगची सोय
- संभाजी चौकी, पुरम चौक, फरासखाना पोलिस ठाणे येथे क्लिनिक
- साडेपाचशे जणांवर प्रतिबंधात्मक कारवाई
- १७ जणांवर 'एमपीडीए'ची कारवाई
मोबाइल अॅप डाउनलोड करा आणि राहा अपडेट
