म. टा. प्रतिनिधी, पुणे
गणपती प्राणप्रतिष्ठा आणि मूर्ती खरेदीनिमित्त शहराच्या मध्यवस्तीतील वाहतुकीत बदल करण्यात आला आहे. शिवाजी रस्ता ते गोटीराम भैय्या चौकापर्यंत, कुंभार वेस चौक ते शिवाजी पूल, नरवीर तानाजी मालुसरे रस्ता (सिंहगड रस्ता), सावरकर पुतळा चौक ते समाधान भेळ सेंटर आदी रस्ते चार आणि पाच सप्टेंबर रोजी वाहतुकीसाठी बंद ठेवण्यात येणार आहेत.
पाच सप्टेंबरपासून गणेशोत्सवास सुरुवात होणार आहे. त्यासाठी चार सप्टेंबरपासून गणेश मूर्तींच्या खरेदीसाठी मोठ्या प्रमाणावर गर्दी होते. सार्वजनिक गणेश मंडळे आणि सामान्य नागरिक मोठ्या संख्येने डेंगळे पूल परिसर, शनिवार वाडा, सारसबाग (सावरकर पुतळा) या ठिकाणी जमतात. त्यावेळी तेथून वाहतूक सुरू ठेवणे अशक्य होऊन बसते. परिणामी, दर वर्षी येथील वाहतुकीत बदल केला जातो. तसेच, पुणे महानगर परिवहन महामंडळाच्या बसमार्गातही बदल केला आहे.
-----
शिवाजी रस्त्याने स्वारगेटला जाणाऱ्या वाहनांसाठी पर्यायी रस्ते :
कुंभारवाड्यापासून शाहीर अमर शेख चौक (जुनाबाजार) मार्गे इच्छितस्थळी जावे.
सूर्य हॉस्पिटल (कसबा पेठ) समोरून पवळे चौक, कमला नेहरू हॉस्पिटल, नरपतगीर चौक, नेहरू रोडने ढोले पाटील (सेव्हन लव्हज) चौकामार्गे.
स. गो. बर्वे चौकातून जंगली महाराज रस्त्याने डेक्कनपर्यंत, तेथून टिळक रस्त्याने स्वारगेटला.
-----
सुरू असलेले रस्ते :
फडके हौद चौक ते जिजामाता चौक ते फुटका बुरूज
अप्पा बळवंत चौक ते बुधवार चौक ते मोती चौक
सोन्या मारुती चौक ते बेलबाग चौक ते सेवासदन चौक
मंगला टॉकिजसमोरील प्रीमिअर गॅरेज लेनमधून शिवाजी रस्ता ते खुडे चौक (सिमला ऑफिस)
-----
पीएमपीच्या बस मार्गातील बदल :
शिवाजी रस्त्याने स्वारगेटकडे जाणाऱ्या बस स. गो. बर्वे चौकातून जंगली महाराज रस्ता आणि पुढे टिळक रस्त्याने स्वारगेटला जातील.
मनपा भवन स्टॉपवरून स्वारगेटला जाणाऱ्या बस जंगली महाराज रस्ता, टिळक रस्त्याने जातील.
मनपा भवन येथून पुणे स्टेशनला जाणाऱ्या बस साठे चौक, कामगार पुतळामार्गे स्टेशनला न जाता, महापालिकेपासून खुडे चौकात (सिमला ऑफिस) आणि तेथून ग्रेड सेपरेटरमधून कामगार पुतळ्यापासून शाहीर अमर शेख चौक (जुना बाजार) येथून स्टेशनला जातील.
मोबाइल अॅप डाउनलोड करा आणि राहा अपडेट
