म. टा. प्रतिनिधी, पुणे
संगीतावर नाचणारे कारंजे किंवा लायटिंगची आरास हे सार्वजनिक गणेशोत्सवातील वर्षानुवर्षाचे आकर्षण ठरले आहे. मंडळांचा कारंजे आणि लायटिंगचा देखावा पाहण्यासाठी आपली पावले आजही थबकतात. अशी आरास आणि देखावे यंदाच्या गौरी-गणपतीमध्ये घरीच अनुभवण्यास मिळाले तर...किंवा गौरी, गणपतीसमोर संगीतावर ठेका धरणारे कारंजे, लायटिंगचे यूएसबी हेल्मेट मिळाले तर.. ही कल्पना यंदा सत्यात येणार आहे. संगीतावर ठेका धरणारे कारंजे आणि लायटिंगने बाजारपेठ झळाळून निघाली आहे.
दिव्यांचा उत्सव म्हणजे दिवाळी असे समीकरण असले तरी, गौरी-गणपती या सणांचे दिव्यांशी वेगळे नाते आहे. गौरी-गणपतीची आरास दिव्यांशिवाय अशक्य आहे. यंदाची आरास सजणार आहे, ती 'एलईडी'च्या दिव्यांनी. सध्या बाजारात 'एलईडी'च्या दिव्यांची, माळांची चलती असून, यंदाच्या उत्सवात रोषणाईचा अनोखा झगमगाट अनुभवायला मिळणार आहे.
हात न लावताही माळांचे रंग आणि संगीत दुरूनही रिमोटच्या मदतीने बदलता येणार आहे. घरात कोठेही बसून दिव्यांची मजा अनुभवता येणार आहे. बाप्पाच्या आगमनाचे वेध लागल्याने वातावरण अधिकच चैतन्यदायी झाले आहे. विद्युत माळांनी दुकाने सजली आहेत. बाजारपेठेत 'एलईडी'च्या दिव्यांचा झगमगाट असून आधुनिक, आकर्षक रंगसंगत, वीज बचत आणि कमी किमतीमुळे 'एलईडी'ला अधिक पसंती मिळत आहे. 'एलईडी'च्या विद्युत माळा मोठ्या प्रमाणावर बाजारात आल्या आहेत. लहान-मोठ्या आकारातील माळा गणेशभक्तांना आकर्षित करीत आहेत. त्यातच संगीतावर ठेका धरणारे कारंजे आणि लायटिंग यंदाचे आकर्षण बनले आहे.
--------------------
कारंजे, हेल्मेट आणि एलईडीचे झुंबर यंदाचे आकर्षण आहे. कारंज्याची किंमत एक हजार रुपयांपासून, तर तर हेल्मेटची किंमत सातशे रुपये आहे. एलईडी झुंबर अकराशे रुपयांमध्ये उपलब्ध आहे. लाइटिंगच्या माळा २० रुपयांपासून ते ५०० रुपयापर्यंत उपलब्ध आहेत. एलईडी पाइप ५० रुपये मीटर दराने मिळू शकेल. यंदा पाऊस चांगला झाल्याने बाजारपेठेत गर्दी होत आहे.
इंद्रसिंह राजपुरोहित, 'एलईडी'व्यावसायिक
--------
छोट्या छोट्या एलईडी हॅलोजनला मागणी आहे. रंगीत, फिरणारे, चालू-बंद होणारे बल्ब आहेत. कमी-अधिक प्रकाश देणारे आणि विशेष म्हणजे केवळ गणेश मूर्तींवर प्रकाश टाकता येतील असे फोकस उपलब्ध आहेत. या सर्व वस्तू पन्नास-शंभर रुपयांपासून तीन हजार रुपयांपर्यंत उपलब्ध आहेत.
अमेय कोठावळे, व्यावसायिक
मोबाइल अॅप डाउनलोड करा आणि राहा अपडेट
