महापालिकेच्या निवडणुकीला अद्याप सहा महिन्यांचा अवधी असला, तरी श्रेयवादाच्या लढाईत आत्तापासूनच राजकीय फटाके फुटण्यास सुरुवात झाली आहे. शहरातील प्रलंबित प्रश्नांवरून राष्ट्रवादी काँग्रेस आणि भारतीय जनता पक्षामध्ये 'तू-तू-मैं-मैं' सुरू असून, महापौर आणि भाजप शहराध्यक्षांमध्ये शाब्दिक युद्ध रंगले आहे.
केंद्रात आणि राज्यात सत्ता प्राप्त केल्यानंतर भाजपला आता पालिकेवर झेंडा रोवायचा आहे. राष्ट्रवादीला गेल्या दहा वर्षांपासूनची सत्ता पुन्हा यापुढे कायम ठेवायची आहे. त्यामुळे, मेट्रोपासून ते डीपीपर्यंत केंद्र-राज्याकडे निर्णयाअभावी रखडलेल्या प्रश्नांबाबत महापौर प्रशांत जगताप यांच्याकडून सातत्याने आवाज उठवला जात आहे. भाजपच्या केंद्रीय स्तरावरील नेत्यांसह मुख्यमंत्री देवेंद्र फडणवीस यांना निवेदन देऊन ते सातत्याने शहराचे प्रश्न मार्गी लागावेत, यासाठी आग्रह धरत आहेत.
महापौरांच्या या भूमिकेचा भाजपच्या शहराध्यक्षांनी समाचार घेतला असून, केंद्र व राज्यातील तत्कालीन आघाडी सरकारमुळेच शहरातील अनेक प्रश्न प्रलंबित राहिल्याचा दावा केला आहे. एवढेच नाही, तर भाजपच्या शहराध्यक्षांनी महापौरांना राष्ट्रवादीचे प्रवक्ते म्हणून संबोधले आहे. तसेच, शहरातील नागरिकांच्या हितासाठी योग्य आणि आवश्यक ते निर्णय वेळेवर घेतले जातील, असे सांगून पक्षाची बाजू सावरण्याचा प्रयत्न केला आहे.
भाजप शहराध्यक्षांच्या आरोपांना महापौरांनी तातडीने प्रत्युत्तर दिले असून, त्यांच्यासारख्या ज्येष्ठांनी योग्य ती माहिती घेऊन मगच बोलावे, असा सल्ला महापौरांनी दिला आहे. तसेच, महापौर कोणत्याही एका पक्षाचा नाही, तर संपूर्ण शहराचा असतो, याची आठवणही त्यांनी शहराध्यक्षांना करून दिली आहे.
सत्तासंघर्ष तीव्र होणार
पालिकेच्या निवडणुकांना अद्याप किमान सहा महिन्यांचा अवधी असला, तरी सत्तेची समीकरणे जुळवण्यासाठी आत्तापासून राजकीय पक्षांचा प्रयत्न सुरू आहे. राज्य सरकारने आगामी निवडणुकीसाठी चार सदस्यांचा एक प्रभाग असल्याचे यापूर्वीच जाहीर केले असल्याने त्यासाठी मोर्चेबांधणी करतानाच, सत्ता प्राप्त करण्याचा संघर्ष यापुढे आणखी तीव्र होत जाणार आहे.
मुख्यमंत्र्यांची भूमिका अस्पष्टच
शहरातील प्रलंबित प्रश्नांविषयी सातत्याने विचारणा करूनही मुख्यमंत्री देवेंद्र फडणवीस यांनी गुरुवारी त्याबद्दल कोणतेही भाष्य केले नाही. मुख्यमंत्र्यांच्या अध्यक्षतेखाली तीन महिन्यांपूर्वी झालेल्या बैठकीत तातडीने प्रश्न मार्गी लावण्याची ग्वाही त्यांनी दिली होती. दुर्दैवाने, शहरातील अनेक प्रश्न अजूनही अनुत्तरित असल्याने एक खासदार, आठ आमदार निवडून देणाऱ्या भाजपच्या नेत्यांना वारंवार जाब विचारला जात आहे.
मोबाइल अॅप डाउनलोड करा आणि राहा अपडेट
