नेमकी गरज समजून घेऊन बदल आवश्यक
पुणे : अकरावी प्रवेश ऑनलाइन होण्याचे हे चौथे वर्ष असले, तरी ती अजून रुळलेली नाही. हे अपयश नक्की कोणाचे, या प्रश्नाचे खरे तर गांभीर्याने उत्तर देण्याची वेळ आली आहे. पुण्यातील अकरावीची प्रवेश प्रक्रिया इतर प्रवेश प्रक्रियेचे मॉडेल जसेच्या तसे कॉपी करून सुरळीत होणार नाही, तर नेमकी गरज समजून त्याचा फेरआढावा घ्यायला हवा.
पुण्यामध्ये सुमारे १५ वर्षे अकरावीचे प्रवेश केंद्रीय पद्धतीने होत होते. या प्रवेश प्रक्रियेत कॉलेजबाह्य घटकांची सुरू झालेली 'दुकानदारी' बंद करण्यासाठी आणि प्रक्रिया अधिक पारदर्शक पद्धतीने पार पडावी, यासाठी ऑनलाइन पद्धत आणली गेली. ऑनलाइन पद्धतीचा हेतू अतिशय चांगला आहे. मुळात त्यामुळे प्रवेश प्रक्रियेत होणारे बरेचसे गैरप्रकार बंद होण्यास मदत झाली, हेही मान्य करावे लागेल. आता प्रश्न आहे, ही प्रक्रिया स्थिरस्थावर होण्याचा...
राज्यातील इंजिनीअरिंग, फार्मसी, मेडिकल, आर्किटेक्चर, हॉटेल मॅनेजमेंट आदी अभ्यासक्रमांच्या प्रवेश प्रक्रिया गेली काही वर्षे ऑनलाइन होत आहेत. त्या आता कुठे स्थिरावल्या आहेत; पण म्हणून त्यांची सरसकट कॉपी करून अकरावीची प्रवेश प्रक्रिया सुरळीत होऊ शकेल का, हा प्रश्न आहेच. मुळात एक गोष्ट लक्षात घ्यायला हवी, ती म्हणजे वर उल्लेखलेल्या सर्व प्रक्रिया या राज्यस्तरावरील होणाऱ्या प्रवेश प्रक्रिया आहेत. अकरावीची प्रक्रिया ही एका शहरापुरती मर्यादित आहे.
दुसरी गोष्ट अशी, की या प्रक्रियांमध्ये भाग घेणारे विद्यार्थी एकाच वेळी अनेक प्रक्रियांत भाग घेणारे असतात. नुसते इंजिनीअरिंगचे उदाहरण घेतले, तरी त्यामध्ये राज्यातील कॉलेजेस, आयआयटी, एनआयटी, बिट्स-पिलानी असे अनेक पर्याय विद्यार्थी चाचपडून पाहत असतो. जोडीने फार्मसी वा आर्किटेक्चरलाही प्रयत्न करीत असतो. बेटरमेंटच्या संधीमध्ये मनासारखे कॉलेज मिळाले नाही, तर शाखाच बदलण्याची संधी त्याच्याकडे असते. अकरावी प्रवेशाचे तसे नाही. सायन्सला प्रवेश घेऊ इच्छिणारा विद्यार्थी पुढे इंजिनीअरिंग किंवा मेडिकलला जाण्यासाठी सायन्सला प्रवेश घेत असतो. त्यामुळे शाखा बदलण्याचा पर्याय त्याच्याकडे नसतो.
..
प्रक्रियेची फेररचना आवश्यक
अकरावीची प्रक्रिया एका शहरापुरती असल्याने त्यातील सर्वोत्तम कॉलेजसाठीची स्पर्धाही तीव्र असते, हेही लक्षात घ्यायला हवे. अशा वेळी एखाद्याला मार्क चांगले आहेत; पण बेटरमेंटच्या एकाच संधीमुळे हवे ते कॉलेज मिळाले नाही आणि दुसऱ्याला मार्क कमी असूनही ते मिळाले, तर असंतोष होणार, हे स्वाभाविक आहे. त्यामुळे प्रक्रियेतील हा दोष काढायलाच हवा आणि तो केवळ एखाद्या प्रवेश प्रक्रियेची कॉपी करून साध्य होणार नाही. त्यासाठी आताच्या रचनेची अनुरूप फेररचनाच गरजेची आहे.
मोबाइल अॅप डाउनलोड करा आणि राहा अपडेट
