अकरावीच्या ऑनलाइन प्रवेश प्रक्रियेविषयी सर्व प्रकारच्या तक्रारी असणाऱ्या विद्यार्थ्यांना सोमवार आणि मंगळवारी (१ आणि २ ऑगस्ट) पुन्हा नव्याने कॉलेजांचे प्राधान्यक्रम नोंदविण्याची संधी मिळणार आहे. त्या आधारे ४ ऑगस्टला नवी गुणवत्ता यादी जाहीर होणार आहे.
अकरावीच्या केंद्रीय प्रवेश नियंत्रण समितीने शुक्रवारी रात्री पाचव्या एकत्रित फेरीचे वेळापत्रक जाहीर केले. त्यामध्ये लांब अंतरावरील कॉलेज मिळालेले, बेटरमेंट घेऊन बाहेर पडलेले, प्रवेश रद्द केलेले, प्रवेश न घेतलेले, शाखा बदलून हवी असलेले, कॉलेजांच्या पसंतीचा चुकीचा क्रम नोंदविलेले, अन्य कोणत्याही कारणाने कॉलेज बदलून हवे असलेले आणि अद्याप कॉलेज निश्चिती न मिळालेल्या विद्यार्थ्यांसाठीच्या पाचवी फेरीचे सविस्तर नियोजन जाहीर करण्यात आले आहे. त्यानुसार या विद्यार्थ्यांसाठी आज, शनिवारी (३० जुलै) कॉलेजांमधील रिक्त जागांचा तपशील http://pune.fyjc.org.in या वेबसाइटवर जाहीर होणार आहे. त्यामधील रिक्त जागांच्या आधाराने विद्यार्थ्यांना नव्याने अर्ज भरताना किमान पाच, तर कमाल १५ पसंतीक्रम नोंदविण्याची संधी समितीने उपलब्ध करून दिली आहे. त्यासाठी जुन्याच लॉगिन आयडी आणि पासवर्डच्या आधारे विद्यार्थी आपले अर्ज भरू शकतील. अशा सर्व विद्यार्थ्यांना ४ आणि ५ ऑगस्टला कॉलेजांमध्ये प्रवेश अंतिम करणे गरजेचे असेल.
00
प्रक्रियेबाहेरील विद्यार्थ्यांसाठी...
अद्याप प्रक्रियेत सहभागीच न झालेल्या, अर्धवट अर्ज भरलेल्या विद्यार्थ्यांसाठीही या फेरीतून प्रवेश निश्चितीसाठी अर्ज करता येईल. त्यासाठी अशा विद्यार्थ्यांनी १ आणि २ ऑगस्टला नव्याने माहिती पुस्तिका घेऊन, त्या आधारे अर्जाचे दोन्ही भाग पूर्ण करणे गरजेचे असेल. या विद्यार्थ्यांची गुणवत्ता यादी ८ ऑगस्टला जाहीर होईल. त्या आधारे विद्यार्थ्यांनी ८ आणि ९ ऑगस्टला प्रवेश घेणे गरजेचे असेल. या नंतरच्या टप्प्यातील विशेष फेरीसाठीच्या रिक्त जागांचा तपशील १० ऑगस्टला जाहीर होणार असल्याचे प्रवेश नियंत्रण समितीने शुक्रवारी रात्री उशिरा जाहीर केले.
मोबाइल अॅप डाउनलोड करा आणि राहा अपडेट