सिमेंट ब्लॉक डोक्यात घालून रेकॉर्डवरील गुन्हेगार युवकाचा दहा ते बारा जणांच्या टोळक्याने खून केला. भरदुपारी चिंचवड स्टेशन येथे पेट्रोल पंपावर रविवारी (१९ जून) ही घटना घडली. घटनास्थळी असलेल्या जमावाने केवळ बघ्याची भूमिका घेतल्याचे आणि मारेकऱ्यांचे सर्व चित्रीकरण सीसीटीव्ही कॅमेऱ्यात कैद झाले आहे. आरोपींनी पाठलाग करून युवकाचा खून केल्याची पोलिसांची माहिती आहे. पोलिस ठाण्याच्या शेजारीच ही घटना घडली.
विनायक कैलास पाटोळे (१८, रा. दत्तनगर, चिंचवड) असे खून झालेल्याचे नाव असून, त्याच्यावर खुनासह अन्य काही गुन्हे दाखल आहेत. सहा महिन्यांपूर्वी सराईत गुंडाचा मोहननगर येथे खून झाला होता. यात विनायक हा असून, त्या वेळीस तो अल्पवयीन होता. पोलिसांनी दिलेल्या माहितीनुसार, विनायक रविवारी चिंचवड स्टेशन चौकातील जयहिंद पेट्रोल पंपाजवळून जात होता. त्या वेळी सात-आठ मारेकऱ्यांनी त्याचा पाठलाग केला. त्यानंतर मारहाण करून जबरदस्तीने दुचाकीवर बसवून घेऊन जाण्याचा प्रयत्न केला. परंतु, तोपर्यंत अन्य आरोपी त्या ठिकाणी आले. त्यांनी जवळच पडलेल्या सिमेंटच्या गट्टूने (विटा) विनायक याला मारहाण करण्यास सुरुवात केली. तो रक्ताच्या थारोळ्यात निपचित पडल्यानंतर देखील मारेकरी त्याच्या डोक्यात सिमेंट गट्टूने घाव घालत असल्याचे सीसीटीव्ही कॅमेऱ्यात कैद झाले आहे. चिंचवड स्टेशनच्या मुख्य चौकात हा प्रकार घडल्यामुळे बघ्यांची गर्दीमुळे वाहतूक कोंडी झाली होती.
विनायक हा गेंदीबाई ताराचंद चोपडा हायस्कूलमध्ये इयत्ता १२वी मध्ये शिकत होता. काही दिवसांपूर्वी कॉलेजमध्ये त्याची भांडणे झाली होती. याच भांडणातून त्याचा खून झाला असावा, असा अंदाज त्याच्या नातेवाईकांनी केला आहे. विनायक याचे वडील टेम्पोचालक असून भाडे असल्यामुळे विनायक अडीचच्या सुमारास टेम्पो घेऊन घराबाहेर पडला. डिझेल आणण्यासाठी तो जयहिंद पेट्रोल पंपावर आला. त्यावेळी मारेकरऱ्यांनीत त्याच्या हल्ला केला. या वेळी अनेक जण पंपावर उपस्थित होते. परंतु, कुणीच मारेकऱ्यांना थांबविले नाही. एकाने मारेकऱ्यांना अडविण्याचा प्रयत्न केला; परंतु त्याला कोणी जुमानले नाही. पिंपरी पोलिस तपास करीत आहेत.
मोबाइल अॅप डाउनलोड करा आणि राहा अपडेट
