म. टा. प्रतिनिधी, पुणे
शहर पोलिस दलातील सर्व उपायुक्त, सहायक आयुक्त, पोलिस निरीक्षक, फौजदारांसह चार हजारांहून अधिक पोलिस कर्मचाऱ्यांना आंतरराष्ट्रीय योगासन दिनी (२१ जून) 'सक्ती'चे योग प्रशिक्षण घ्यावे लागणार आहे. उद्या, मंगळवारी पोलिस मुख्यालयाच्या मैदानावर सर्व अधिकारी-कर्मचारी श्वसनावर लक्ष केंद्रित करून योगाभ्यास करणार आहेत. पोलिस मुख्यालयाच्या उपायुक्तांनी योग प्रशिक्षणाबाबत आदेश काढून सर्व घटकांच्या प्रमुखांनी आज, सोमवारपर्यंत पोलिस कर्मचाऱ्यांची नावे मुख्यालयात पाठवण्यास सांगितले आहे. पोलिस अधिकारी आणि कर्मचाऱ्यांनी कोणत्या प्रकारचा पोशाख परिधान करायचा, याबाबतही स्पष्ट सूचना देण्यात आल्या आहेत.
पोलिस अधिकाऱ्यांनी सफेद रंगाची पँट आणि टी-शर्ट, पांढऱ्या रंगाचे शूज घालण्यास सांगण्यात आले आहे. तर कर्मचाऱ्यांनी खाकी रंगाची पँट, सफेद गोल गळ्याचा टी-शर्ट, फूल बनियन, ब्राउन पी. टी. शूज घालणे बंधनकारक करण्यात आले आहे. अधिकारी-कर्मचाऱ्यांनी प्रशिक्षणासाठी येताना सोबत सतरंजी आणण्यास सांगण्यात आले आहे.
'जागतिक योग दिनी पोलिस आयुक्तालयात मोठ्या प्रमाणात योग प्रशिक्षणाच्या कार्यक्रमाचे आयोजन करण्यात आले आहे. पोलिस मुख्यालयात तयारी सुरू असून आयुक्तालयातील जास्तीत जास्त मनुष्यबळाने या प्रशिक्षणाचा लाभ घ्यावा, अशी भावना यामागील आहे,' असे आदेशात या म्हटले आहे.
पंतप्रधान नरेंद्र मोदी यांच्या योगदिनाच्या आवाहनाला गेल्या वर्षी जगभरातून मोठ्या प्रमाणात प्रतिसाद मिळाला होता. या वर्षी दुसरा जागतिक योगदिन साजरा करण्यासाठी राज्यात मोठ्या प्रमाणात तयारी करण्यात येत आहे. या पार्श्वभूमीवर पुणे पोलिसांनी चार हजारांहून अधिक पोलिस कर्मचाऱ्यांना योग प्रशिक्षणासाठी सकाळी साडेसहा वाजता पोलिस आयुक्तालयावर हजर राहण्याचे आदेश दिले आहेत.
उपस्थिती आवश्यक
शहर पोलिस दलातील सर्व पोलीस उपायुक्त, सहायक आयुक्त, पोलिस निरीक्षक, सहायक पोलिस निरीक्षक, फौजदार, विशेष शाखा, गुन्हे शाखा, नियंत्रण कक्ष, अतिक्रमण विभाग, बॉम्बशोधक पथक, जलद प्रतिसाद दलाचे कर्मचारी, मोटार ट्रान्स्पोर्ट, वायरलेस शाखेतील सर्व कर्मचारी, प्रत्येक पोलिस ठाण्यातील ४० कर्मचारी, वाहतुक शाखेकडील ६०० कर्मचारी, पोलिस मुख्यालयातील एक हजार कर्मचाऱ्यांना योगदिनी प्रशिक्षण दिले जाणार आहे.
मोबाइल अॅप डाउनलोड करा आणि राहा अपडेट
