म. टा. प्रतिनिधी, पुणे
अवघ्या दहा दिवसांपूर्वीच लोकार्पण झालेल्या स्वारगेट येथील उड्डाणपुलाच्या कामातील त्रुटी पहिल्या पावसातच उघड्यावर आल्या आहेत. पुलावर साठलेले पावसाचे पाणी वाहून जाण्याची पुरेशी व्यवस्था न केल्याने, ते पाणी थेट 'शॉवर'सारखे येणाऱ्याजाणाऱ्यांवर बरसत आहे.
स्वारगेट येथील जेधे चौक हा कायमच वर्दळ असणारा मुख्य चौक आहे. येथे वाहनांबरोबरच पादचारीही मोठ्या संख्येने असतात. चौकात सातारा रोडने येणाऱ्या वाहनांना शंकरशेट रोड आणि नेहरू स्टेडिअमकडे जाण्यासाठी उड्डाणपूल खुला करण्यात आला. मात्र, अद्याप चौकातील वर्दळ कमी झाली नसल्याचे दिसून आले आहे. दरम्यान, पावसाळ्यात पुलावर साठणाऱ्या पाण्याबाबत उभारणीच्यावेळी विचार करण्यात आलेला नाही. त्यामुळे गेल्या दोन-तीन दिवसांत झालेल्या पावसाचे साठलेले पाणी थेट रस्त्यावर पडत आहे. त्याचा नागरिकांना आणि वाहनचालकांना त्रास होत आहे. उड्डाणपुलावरून पडणारे पाणी चुकविताना किंवा गाड्या घसरून अपघात होण्याचा धोका संभवतो.
तसेच, येत्या काळात शंकरशेट रोडकडून येणाऱ्या वाहनांना नेहरू स्टेडिअमकडे जाण्यासाठी ग्रेड सेपरेटर उभारण्यात येणार आहे. त्यामुळे भविष्यात उड्डाणपूल आणि ग्रेड सेपरेटर व्यतिरिक्त होणारी रस्ते वाहतूक उड्डाणपुलाच्या डाव्या बाजूच्या लेनमधूनच होण्याची शक्यता आहे. म्हणजेच, ज्या भागातून पाणी थेट खाली येते, तेथूनच वाहतूक चालणार आहे. सातारा रोडवर बालाजीनगर परिसरात काही महिन्यांपूर्वी वाहतुकीसाठी खुल्या केलेल्या उड्डाणपुलावर साचलेले पाणी जलवाहिनीद्वारे उड्डाणपुलाच्या 'पिलर'जवळ खालील भागात आणून सोडले जाते. त्यामुळे स्वारगेट उड्डाणपुलावरही त्याच पद्धतीने पाण्यासाठी उपाययोजना करावी, अशी मागणी केली जात आहे.
------
दुकानांनाही बसतोय फटका
उड्डाणपुलावरून खाली 'शॉवर'प्रमाणे कोसळणारे पाणी हवेमुळे रस्त्याच्या कडेला असलेल्या दुकानांमध्ये जात असल्याचे रविवारी रात्री निदर्शनास आले. त्यामुळे रस्त्यावरील सामान्य नागरिकांसह व्यावसायिकांनाही याचा फटका बसत आहे.
मोबाइल अॅप डाउनलोड करा आणि राहा अपडेट
