म. टा. प्रतिनिधी, पुणे
'ऑफिस ऑफ प्रॉफिट' समजल्या जाणाऱ्या पुण्यातील चांगल्या पोस्टिंगसाठी अधिकाऱ्यांमध्ये जोरदार साठमारी सुरू असून, सत्ताधारी राजकारणी आणि 'परिवारा'तून त्यासाठी दबावतंत्र अवलंबले जात असल्याची जोरदार चर्चा जिल्हाधिकारी कार्यालयात आहे. दरम्यान, पुणे विभागातील बदल्यांचे प्रस्ताव विभागीय आयुक्त कार्यालयातून राज्य सरकारला पाठविण्यात आले आहेत.
विभागीय आयुक्त कार्यालयाकडून बदल्यांचे प्रस्ताव सादर झाल्यामुळे आज, मंगळवारी रात्री उशिरापर्यंत बदल्यांचे आदेश निघण्याची शक्यता आहे. पुण्यातील हवेली, खेड व पुणे उपविभागीय अधिकारी या महत्त्वाच्या समजल्या जाणाऱ्या पदासांठी जोरदार साठमारी सुरू असल्याचे समजते. हवेली व खेड उपविभागीय अधिकारी पदावर महिला अधिकाऱ्यांचीच वर्णी लागेल अशी जोरदार चर्चा आहे.
महापालिका, जिल्हा परिषद व नगर पालिकांच्या निवडणुकांच्या पार्श्वभूमीवर एकाच पदावर तीन वर्षे झालेल्या अधिकाऱ्यांची बदली होणार आहे. तसेच, निवडणूक होणाऱ्या ठिकाणचे निवासी असलेल्या अधिकाऱ्यांना जिल्ह्याबाहेर नियुक्ती द्यावी, असे आयोगाचे आदेश आहेत. या आदेशामुळे पुण्यात चांगल्या पोस्टिंगवर येऊ इच्छिणाऱ्यांची अडचण झाली आहे. आयोगाचे हे आदेश अडचणीचे ठरत असल्याने ते शिथिल करण्याचा प्रयत्न महसूल विभागाकडून केला जात आहे. तसेच बदल्यांचे हे निकष केवळ महसूल विभागालाच लावले जातात. पोलिस, महापालिका, जिल्हा परिषद व नगर पालिकांच्या अधिकाऱ्यांना निवडणुकीचे निकष लावले जात नाहीत हे आयोगाच्या निदर्शनास आणण्यात येणार असल्याचे समजते.
दरम्यान, उपजिल्हाधिकारी दर्जाच्या अधिकाऱ्यांच्या एकाचवेळी बदल्या करणे अडचणीचे ठरू शकते. त्यामुळे ३१ मे रोजी तीन वर्षांचा कार्यकाल पूर्ण होणाऱ्या अधिकाऱ्यांची तूर्त बदली करण्यात येणार असल्याचे कळते. त्यानंतर ऑगस्ट महिन्यात उर्वरित बदल्या होणार असल्याचे सूत्रांकडून सांगण्यात आले. दरम्यान, क्रीम पोस्टिंगसाठी सत्ताधारी राजकीय नेत्यांबरोबरच परिवाराच्या माध्यमातून जोरदार वशिलेबाजी सुरू असल्याची चर्चा आहे. त्यात हवेली, खेड, पुणे उपविभागीय अधिकारी, जिल्हा पुरवठा अधिकारी, पुरवठा उपायुक्त, अतिरिक्त जिल्हाधिकारी तसेच पुणे व पिंपरी महापालिकेतील काही पदांचा समावेश आहे.
मोबाइल अॅप डाउनलोड करा आणि राहा अपडेट
