म. टा. प्रतिनिधी, पुणे
राज्य सरकारच्या वतीने गोंदिया येथे नुकतेच झालेले व्यसनमुक्ती साहित्य संमेलन; तसेच पुरस्कार वितरण कार्यक्रमाच्या खर्चात गैरव्यवहार झाला आहे, असा आरोप आचार्य विनोबा लोकसेवा संघाने केला आहे. यापूर्वी पुणे आणि मुंबई शहरात झालेल्या संमेलनाच्या खर्चापेक्षा हा खर्च दुपटीपेक्षा अधिक असून, तो एक कोटी ४२ लाख २५ हजार ५६ रुपये इतका झाल्याचे माहिती अधिकारातून उघडकीस आले आहे.
संघाचे दीपक निकम यांनी पत्रकार परिषदेत ही माहिती दिली. व्यसनमुक्ती संमेलन आणि महात्मा गांधी व्यसनमुक्ती सेवा पुरस्कार वाटपात घोटाळा झाला. पुण्यात ५१ लाख, नागपूरला ५८ लाख ८५ हजार, मुंबईत ६६ लाख २६ हजार रुपयांचा खर्च संमेलनासाठी झाला. पुणे, नागपूर, मुंबई शहराच्या तुलनेने छोट्या व मागासलेल्या गोंदिया जिल्ह्यातील संमेलनात मात्र एक कोटी ४२ लाख २५ हजार ५६ रुपयांचा खर्च झाला. त्यापैकी मुंबईच्या एका जाहिरात कंपनीला एक कोटी २१ लाख ५१ हजार ८८६ रुपयांची रक्कम देण्यात आली आहे. त्याबाबत निकम यांनी संशय व्यक्त केला आहे. संमेलनात प्रस्ताव न देणाऱ्या व्यक्तींनाही पुरस्कार देण्यात आल्याचा आरोप केला.
'नाना पाटेकर, मकरंद अनासपुरे हे दोघेही दुष्काळग्रस्तांच्या मदतीसाठी धावून आले आहेत. मात्र, संमेलनात गायनासाठी अवधूत गुप्ते यांनी अडीच लाख, तर अभिनेता देवदत्त नागे यांनी ७५ हजार रुपयांचे मानधन स्वीकारले. संमेलनाच्या खर्चाबाबत मुख्यमंत्री देवेंद्र फडणवीस आणि अर्थमंत्री सुधीर मुनगंटीवार यांना निवेदन पाठविले आहे. त्याबाबत प्रतिसाद मिळालेला नाही. या संदर्भात लवकरच आंदोलन करण्यात येईल,' असा इशाराही त्यांनी दिला.
मोबाइल अॅप डाउनलोड करा आणि राहा अपडेट
