मोबाइल अॅप डाउनलोड करा आणि राहा अपडेट
म. टा. प्रतिनिधी, पिंपरी भक्तीशक्ती चौक, निगडी येथील हॉटेल तिरुमध्ये खोली दिली नाही म्हणून टोळक्याने सुरक्षारक्षकास मारहाण करून हॉटेलमधील साहित्याची तोडफोड केली. मारहाण करणाऱ्या टोळक्यातील एकाला हॉटेलच्या कर्मचाऱ्यांनीही मारहाण केली आहे. या प्रकरणी निगडी पोलिस ठाण्यात हॉटेल व्यवस्थापक मनोज हेगडे आणि प्रदीप पांडे यांनी परस्परविरोधी गुन्हे दाखल केले आहेत. हेगडे यांनी दिलेल्या फिर्यादीनुसार, प्रदीप पांडे व त्याच्या इतर आठ ते दहा साथीदारांविरुद्ध गुन्हा दाखल करण्यात आलेला आहे. या प्रकारात सुरक्षारक्षक टेक बहादूर (३०) हा जखमी झाला असून त्याच्यावर हॉस्पिटलमध्ये उपचार सुरू आहेत. पोलिसांनी दिलेल्या माहितीनुसार, निगडी भक्ती-शक्ती येथे हॉटेल तिरु असून तेथे राहण्याची सोय आहे. शनिवारी रात्री साडेअकराच्या सुमारास प्रदीप तेथे खोली भाड्याने घेण्यासाठी आला. मात्र, लॉजमधील एकही खोली रिकामी नसल्याचे त्याला सांगण्यात आले. आपणाला खोली मुद्दाम दिली जात नाही, असा समज करून प्रदीप याने हॉटेलच्या कर्मचाऱ्यांशी वादावादी केली व तो निघून गेला. पहाटे दीडच्या सुमारास प्रदीप त्याच्या आठ ते दहा साथीदारांना घेऊन आला. हॉटेलच्या दरवाजावर असलेल्या टेक बहादूर याला मारहाण करून त्याच्याकडील चावी घेतली. दरवाजा उघडून ते जबरदस्तीने हॉटेलमध्ये घुसले. त्यानंतर हॉटेलच्या खुर्चा, टेबल व काचा फोडून टाकल्या. या वेळी हॉटेल कर्मचाऱ्यांनाही मारहाण करण्यात आली. पांडे याने दिलेल्या फिर्यादीनुसार, मनोज हेगडे व इतरांविरुद्ध गुन्हा दाखल करण्यात आल आहे. चिडलेल्या हॉटेल कर्मचाऱ्यांनी प्रदीप पांडे याला मारहाण केली, तसेच त्याच्या आकुर्डी येथील दूध डेअरीसमोर जाऊन तेथील दोन दुचाकींची तोडफोड करून नुकसान केले. या प्रकरणी दोघांनीही निगडी पोलिसांकडे तक्रारी दिल्या आहेत.
