म. टा. प्रतिनिधी, पुणे
सध्या महाराष्ट्राच्या खेड्यापाड्यांपासून ते शहरांनाही दुष्काळाच्या झळा सोसाव्या लागत आहेत. त्यामुळेच पाणी टंचाईवर कायमस्वरुपी मात करण्यासाठी आता 'रेन वॉटर हार्वेस्टिंग'चे मॉडेल विकसित करण्यात आले आहे. पुण्यातील ग्रीन एनर्जी फाउंडेशनचा मॉडेल रथ केंद्रीय पेयजल मंत्रालयाच्या माध्यमातून देशभर फिरत असून, पुण्यानंतर तो लातूरला जाणार आहे.
ग्रीन एनर्जी फाउंडेशनने रेन वॉटर हार्वेस्टिंगचे हे मॉडेल शास्त्रोक्त पद्धतीने तयार केले आहे. पुण्यात सरासरी ७२२ मिलीमीटर इतका पाऊस पडतो. एक हजार चौरस फूट क्षेत्रफळाचा विचार करता ६० हजार लिटर पावसाचे पाणी या 'रेन वॉटर हार्वेस्टिंग'च्या माध्यमातून वाचविणे शक्य आहे. अशा या मॉडेलमध्ये पावसाचे पाणी पाईपद्वारे एकत्र आणून त्याचे शुद्धीकरण केले जाऊ शकते. नंतर ते टाकीत जमा होते. त्यामुळे ते पाणी पिण्यायोग्य होते. पावसाळ्याचे साठवलेले पाणी पुढील तीन ते चार महिन्यापर्यंत पुरेल इतके असते. त्यातून सोसायटी अथवा घराच्या पाणी व वीजपट्टीत मोठी बचत होणे शक्य आहे,' अशी माहिती ग्रीन एनर्जी फाउंडेशनच्या प्रमुख शर्मिला ओसवाल यांनी दिली.
शास्त्रोक्त पद्धतीच्या 'रेन वॉटर हार्वेस्टिंग'द्वारे पुण्यातील सर्व भागातील सर्वांचाच पाण्याचा प्रश्न सुटण्यात मदत होईल. इन्फोसिस व सिंध हाऊसिंग सोसायटीत या पद्धतीने रेन वॉटर हार्वेस्टिंग करण्यात आले आहे. हे सोशल इनोव्हेशनचे मॉडेल आहे. महापालिका, सरकार अथवा सोसायट्या अशा कोणीही पुढाकार घेतल्यास आम्ही मार्गदर्शन करण्यासाठी तयार आहोत. रेन वॉटर हार्वेस्टिंगचे हे मॉडेल तयार झाल्यानंतर त्याचे राष्ट्रीय व आंतरराष्ट्रीय परिषदांमध्ये सादरीकरण करण्यात आले. त्यास वर्ल्ड वॉटर लीडरशीप काँग्रेससह अन्य विविध संस्थांनी गौरविले आहे, असेही त्यांनी सांगितले.
मोबाइल अॅप डाउनलोड करा आणि राहा अपडेट