कन्हैयाकुमारची पुण्यात सभा होणारच
म. टा. प्रतिनिधी, पुणे
अखिल भारतीय विद्यार्थी परिषद आणि भाजप युवा मोर्चा यांनी विरोध केला असला, तरी कन्हैयाकुमारची पुण्यात सभा होणारच, असे ऑल इंडिया स्टुडंट्स फेडरेशनने (एआयएसएफ) सोमवारी जाहीर केले. पुण्याबरोबरच मुंबई, कोल्हापूर, औरंगाबाद, बीड, नागपूर आणि अमरावती या भागातही पुरोगामी शक्तींना बरोबर घेऊन सभा घेतल्या जाणार असल्याचे सांगून त्यांनी भाजपप्रणित संघटनांना आव्हान दिले. कन्हैयाकुमार यांनीही सभेसाठी येण्यास होकार दिला आहे.
'एआयएसएफ' आणि ऑल इंडिया यूथ फेडरेशन (एआयवायएफ) या संघटनांच्या पदाधिकाऱ्यांनी पत्रकार भवन येथे पत्रकार परिषद घेऊन ही घोषणा केली. या वेळी 'एआयवायएफ'चे राष्ट्रीय कार्यकारिणी सदस्य गिरीश फोंडे, प्रसाद घागरे, 'एआयएसएफ'चे राज्याध्यक्ष पंकज चव्हाण, माजी राष्ट्रीय महासचिव अभय टाकसाळ, माजी राज्य सरचिटणीस सुशील लाड, राकेश शुक्ला आदी उपस्थित होते.
'कन्हैयाकुमारवर खोटा आरोप करण्यात आला. मात्र, दिल्ली पोलिसांनी कन्हैयाकुमारविरूद्ध काहीही पुरावा नसल्याचे सांगितले. पुण्यात फर्ग्युसन कॉलेज आणि रानडे इन्स्टिट्यूटमधील प्रकारांनंतर आता विचाराचा लढा द्यावा लागणार आहे. त्यासाठी पुण्यात एप्रिल महिन्यात कन्हैयाकुमार यांची सभा घेतली जाणार आहे. सभेचे ठिकाण लवकरच निश्चित करण्यात येणार आहे,' असे फोंडे यांनी सांगितले.
'पुण्यानंतर मुंबई, कोल्हापूर, औरंगाबाद, बीड, नागपूर आणि अमरावती या ठिकाणीही सभा होणार आहेत. रोहित येमुलाच्या आईदेखील या सभांना उपस्थित राहणार आहेत,' असेही फोंडे म्हणाले.
पत्रकार परिषदेत कन्हैयाकुमार यांच्याशी फोंडे यांनी मोबाइलवरून संवाद साधला. तो संवाद उपस्थितांना ऐकविण्यात आला. कन्हैयाकुमार म्हणाले, 'न्यायासाठी, संघर्ष करण्यासाठी मी पुण्यात येणारच. धमक्या देण्याची भाजप युवा मोर्चा आणि अभाविपची जुनी सवय आहे. भाजप आणि हे सर्वजण एकाच माळेचे मणी आहेत. हे अन्याय करणारे लोक आहेत. त्यामुळे मी देशभर फिरून सत्य बाजू मांडणार.'
'प्रत्येकाला व्यक्तिस्वातंत्र आहे. मात्र, या सरकारकडून दबाब आणण्यात येत आहे. अभाविप आणि भारतीय युवा मोर्चाकडून धमक्या येत आहेत. तरीही लोकशाही मार्गाने या सभा घेण्यात येतील,' असे चव्हाण यांनी सांगितले.
मोबाइल अॅप डाउनलोड करा आणि राहा अपडेट