अभियान गुंडाळले
यशवंतराव चव्हाणांच्या नावे सुरू केलेली स्वच्छता योजना मध्येच बंद
म. टा. प्रतिनिधी, पुणे
शहरातील अस्वच्छता, कचऱ्याचे ढीग कमी करण्यासह स्थानिक स्तरावर सार्वजनिक शौचालयांची योग्य निगा राखण्यास प्रोत्साहन देण्यासाठी पुणे महापालिकेने सुरू केलेली 'यशवंतराव चव्हाण शहर स्वच्छता अभियान' ही प्रभाग स्तरावरील स्वच्छतेची स्पर्धा अवघ्या दोन वर्षांत गुंडाळण्यात आली आहे. राज्याच्या पहिल्या मुख्यमंत्र्यांच्या नावे सुरू असलेली योजना मध्येच बंद करण्यात आल्याने त्याविरोधात तीव्र नाराजी व्यक्त केली जात आहे.
यशवंतराव चव्हाण यांच्या जन्मशताब्दी वर्षानिमित्त शहरातील विविध प्रभागांमधून स्वच्छ प्रभाग निवडण्यासाठी ही स्पर्धा जाहीर करण्यात आली. स्वच्छता स्पर्धेतील पहिल्या तीन प्रभागांना अनुक्रमे दोन कोटी, दीड कोटी आणि एक कोटी रुपयांचे भरघोस बक्षिस देण्याचे निश्चित केले गेले. हा निधी प्रभागामध्ये घनकचरा व्यवस्थापनाच्या प्रकल्पांसाठी वापरण्यात यावा, असे बंधनही घातले गेले. दोन वर्षे या स्पर्धेतील विजेते घोषित केल्यानंतर गेल्या वर्षीपासून महापालिकेने योजनेतील अंग काढून घेतले आहे. त्यामुळे, गेल्या वर्षी ही प्रक्रियाच राबविण्यात आली नाही, तर आता आगामी आर्थिक वर्षाच्या बजेटमध्ये संबंधित योजनेसाठी एक रुपयाचीही तरतूद करण्यात आलेली नाही. शहरातील स्वच्छतेविषयी केंद्र आणि राज्य सरकारतर्फे 'स्वच्छ भारत' आणि 'स्वच्छ महाराष्ट्र' योजना सुरू झाल्या असल्याने चव्हाण यांच्या नावे सुरू असलेल्या योजनेला थेट कात्री लावण्यात आली आहे. मात्र, स्थानिक स्तरावर अशी योजना चालू राहणे गरजेचे असल्याचे मत बहुतांश लोकप्रतिनिधींकडून व्यक्त केले जात आहे. तसेच, चव्हाण यांच्या जन्मशताब्दी वर्षानिमित्त सुरू झालेली योजना गुंडाळल्याने महापालिका आयुक्तांवर टीका केली जात आहे.
प्रभागातील घनकचऱ्याची परिस्थिती, ओला-सुका कचऱ्याचे वर्गीकरण, कचऱ्यावर होणारी प्रक्रिया, कंटेनरमुक्त परिसर अशा विविध निकषांवर स्पर्धेतील सहभागी प्रभागांचे मूल्यांकन करण्यात आले. त्यानुसार, पहिल्या वर्षी मनसेचे गटनेते बाबू आणि वनिता वागसकर यांच्या प्रभागाला, तर दुसऱ्या वर्षी राष्ट्रवादी काँग्रेसच्या विशाल तांबे आणि मोहिनी देवकर यांच्या प्रभागाला सर्वोत्कृष्ट स्वच्छ प्रभागाचे दोन कोटी रुपयांचे बक्षीस मिळाले. त्यातून, प्रभागात घनकचऱ्याविषयी आणखी सुधारणा करणे त्यांना शक्य झाले.
'स्वच्छता स्पर्धेतून मिळालेल्या निधीत आमच्या विकासकामांतून आणखी भर घातली. त्यामुळे, १६ टन कचऱ्यावर प्रक्रिया प्रकल्प कार्यान्वित करता आला. प्रभाग स्तरावरील स्वच्छतेला प्रोत्साहन देण्यासाठी ही योजना यापुढे राबवायला हवी.'
- वनिता वागसकर, महाराष्ट्र नवनिर्माण सेना
'स्वच्छता स्पर्धेतून स्थानिक स्तरावर प्रभाग नेमका कोठे आहे, कोणत्या सुधारणा व्हायला हव्यात, याचे नेमके विश्लेषण समजू शकत होते. केंद्र-राज्य सरकारने संपूर्ण शहरासाठी योजना सुरू केल्या असल्या, तरी स्थानिक स्तरावरील ही योजना बंद करण्याचे कारण नव्हते.'
- विशाल तांबे, माजी अध्यक्ष, स्थायी समिती
मोबाइल अॅप डाउनलोड करा आणि राहा अपडेट
