येरवडा क्षेत्रीय कार्यालयाच्या अतिक्रमण आणि बांधकाम विभागाकडून मंगळवारी विश्रांतवाडी भागात जोरदार अतिक्रमण कारवाई करण्यात आली. आळंदी रस्ता आणि विश्रांतवाडी ते विमानतळ रस्त्यावरील रस्त्याच्या कडेला असलेल्या दुकानदार, पथारीवाल्यांवर कारवाई करण्यात आली. विश्रांतवाडी ते विमानतळ रस्त्याच्या कडेला बसलेले पथारी व्यावसायिक, रस्त्यावर वाढीव बांधकाम केलेले वाढीव दुकानदार आणि पदपथावर फर्निचर ठेवणाऱ्या व्यावसायिक यांच्यावर पालिकेकडून अतिक्रमण कारवाई करण्यात आली. या मार्गावरील अनेक दुकानदारांनी अनधिकृत सिमेंटचे वाढीव बांधकाम, पत्रे आणि शेड टाकून अतिक्रमण केले होते. फर्निचर व्यावसायिकांनी पदपथावर खुर्च्या, टेबल शोकेस ठेवून रस्ता बंद केल्याने त्यांच्यावर कारवाई करण्यात आली. तसेच, विद्यानगर भागात दुचाकींची विक्री करणाऱ्या शांती होंडा शोरूमने पदपथावर दुचाकी उभ्या केल्याने त्यांच्यावरही दंडात्मक कारवाई केल्याची माहिती पालिका अधिकाऱ्यांनी दिली. सहायक आयुक्त संध्या गागरे यांच्या नेतृत्त्वाखाली उपभियंता नाथा चव्हाण, बांधकाम निरीक्षक प्रवीण भावसार, अतिक्रमण निरीक्षक राजेंद्र लोंढे, अधिकारी आणि कर्मचारी यांनी कारवाई केली. या वेळी महापालिका आणि पोलिसांनी मोठा बंदोबस्त तैनात केला होता. कारवाईत एक जेसीबी आणि बिगारी यांचा समावेश होता.
मोबाइल अॅप डाउनलोड करा आणि राहा अपडेट