म. टा. प्रतिनिधी, पुणे
हवामानातील तापमान, बाष्प आणि अन्य घटकांच्या प्रमाणानुसार हवामान विभागातर्फे लवकरच हेल्थ अलर्ट जारी केले जाणार आहेत. त्यामुळे हवामान बिघडल्यास त्याचे आरोग्यावर कसे परिणाम होतील, हेदेखील काही वेळ आधीच समजू शकणार आहे. त्याचबरोबर विशिष्ट हवामानात रोगजंतूंवर काय परिणाम होईल, याचाही अंदाज आल्यामुळे योग्य ती काळजी घेणेही शक्य होऊ शकेल.
हेल्थ अलर्टस जारी करण्याच्या दृष्टीने सध्या हवामान विभागातर्फे प्रायोगिक तत्त्वावर पुणे आणि नवी दिल्ली येथील थंडीच्या नोंदी घेण्यात येत आहेत. लवकरच ही सेवा व्यापक प्रमाणावर उपलब्ध होऊ शकेल.
'आरोग्य आणि हवामान या एकमेकांशी अत्यंत निगडीत बाबी आहेत. नागरिकांच्या हितासाठी आपल्याकडील माहिती एकमेकांना उपलब्ध करून देण्याचा निर्णय आरोग्य आणि हवामान विभागाने घेतला आहे. त्या आधारे ही सेवा सुरू करण्यात येणार आहे. सध्या प्रायोगिक तत्त्वावर या सेवेबाबतचे काम सुरू असून, लवकरच याचा विस्तार करण्यात येईल. येत्या उन्हाळ्यापासून ही सेवा उपलब्ध होईल,' असे हवामान विभागाचे अतिरिक्त महासंचालक (संशोधन) बी. मुखोपाध्याय यांनी पत्रकारांशी बोलताना सांगितले.
'हवामानातील तापमान आणि बाष्प या घटकांच्या विशिष्ट प्रमाणात काही विषाणू जीवंत राहतात किंवा मृत पावतात. त्याचबरोबर विशिष्ट प्रकारचे अनुकूल हवामान असल्यास काही विषाणूंचा मोठ्या प्रमाणावर प्रसारही होऊ शकतो. त्यामुळे हवामानातील बदलांची योग्य ती पूर्वसूचना आरोग्य विभागाला देण्यात येईल,' असे मुखोपाध्याय यांनी स्पष्ट केले.
मोबाइल अॅप डाउनलोड करा आणि राहा अपडेट
