चिंचवड देवस्थानचे मुख्य विश्वस्त सुरेंद्र महाराज धरणीधर देव (वय ६३) यांनी रविवारी (१७ जानेवारी) मंगलमूर्ती वाड्यात गळफास घेऊन आत्महत्या केली होती. चार दिवसानंतर देखील देव महाराजांच्या आत्महत्येचे गूढ कायम असून, त्यांच्या आत्महत्येचे नेमके कारण अद्याप स्पष्ट झालेले नाही.
महाराज राहत असलेल्या मंगलमूर्ती वाड्यात योगसाधनेच्या खोलीत त्यांनी गळफास घेऊन आत्महत्या केल्याचे रविवारी सकाळी उघडकीस आले होते. या धक्कादायक घटनेनंतर शहरात एकच खळबळ उडाली होती. सोमवारी त्यांच्यावर अंत्यविधी करण्यात आले. त्यावेळेस सर्वच क्षेत्रातील मान्यवर आणि नागरिक मोठ्या संख्येने उपस्थित होते.
देवस्थानच्या परंपरेनुसार २००१ सालापासून महाराजांकडे मुख्य विश्वस्तपदाची धुरा आली होती. देवस्थानच्या अनेक जमीनी त्यांनी गेल्या काही वर्षांमध्ये शहराच्या विकासासाठी उपलब्ध करून दिल्या होत्या. देवस्थानाचा उत्सव मोठ्या स्वरूपात आणि नवनव्या कल्पकतेने करण्याकडे महाराजांना नेहमी कल असे. पण मध्यंतरीच्या काळात देवस्थानच्या ठराविक जमिनी बळकविण्याचा प्रयत्न देखील शहरातील काही बिल्डरांनी केला होता.
महाराजांनी पिंपरी-चिंचवड महानगरपालिकेची १९९२ ला निवडणूक लढविली होती. त्यानंतर पुढील पंचवार्षिकला त्यांची स्वीकृत म्हणून देखील निवड झाली होती. शिक्षण मंडळाचे सभापती म्हणून देखील त्यांनी काही काळ काम पाहिले आहे. महाराजांवर मध्यंतरी गुडघा प्रत्यारोपणाची शस्त्रक्रिया करण्यात आली होती. त्यामुळे ते जाहीर कार्यक्रमांपासून काहीसे दूर असल्याचे सांगितले जाते.
त्यामुळे त्यांच्या आत्महत्येचा वरील सर्व घटना आणि इतिहासाचा काही संबंध आहे का याची चाचपणी करण्यात येत असल्याचे पोलिसांनी मटाशी बोलताना सांगितले. सध्यातरी महाराजांच्या आत्महत्येबाबत ठोस काहीच हाती लागलेले नाही. मात्र, सर्व शक्यता पडताळून पाहण्यात येत असल्याचेही उच्चपदस्थ पोलिस अधिकाऱ्यांनी या वेळी नमूद केले.
मोबाइल अॅप डाउनलोड करा आणि राहा अपडेट
