सोनसाखळी चोरट्यांनी एकप्रकारे पोलिसांनाच आव्हान दिले असून रविवारी शहरात दिवसभरात विविध ठिकाणी चार सोनसाखळी चोरीच्या घटना घडल्या आहेत. दत्तवाडी, भारती विद्यापीठ, सांगवी आणि विश्रामबाग पोलिस ठाण्याच्या हद्दीत घडलेल्या या घटनांमध्ये साधारण दहा तोळ्याचे दागिने चोरीला गेले आहेत. या घटनांमुळे पोलिस सुस्त तर सोनसाखळी चोरांचे 'मस्त' झाल्याचे चित्र दिसत आहे.
शहरात सोनसाखळी चोरीचे सत्र सुरूच आहे. शहरात दररोज किमान एक ते दोन घटना घडत आहेत. शहरात रविवारी पहिली सोनसाखळी चोरीची घटना दत्तवाडी पोलिस ठाण्याच्या हद्दीत दुपारी बाराच्या सुमारास घडली. याबाबत शोभा बाळकृष्ण अनगळ (वय ७०, रा. लक्षलेखा सोसायटी, सहकारनगर) यांनी दत्तवाडी पोलिस ठाण्यात फिर्याद दाखल केली आहे. अनगळ या त्यांच्या मैत्रिणीला भेटण्यासाठी सरकारनगर येथे गेल्या होत्या. त्यानंतर त्या दोघी मैत्रिणी भाजी आणण्यासाठी म्हणून घराबाहरे पडल्या. बाराच्या सुमारा अॅक्सीस सुझुकी मोटारसायकलवरून आलेल्या दोघांनी अनगळ यांच्या गळ्यातील तीस हजार रुपये किंमतीचे मंगळसूत्र हिसका मारून चिंतामणी सोसायटीच्या दिशने पळून गेले. या प्रकरणी दत्तवाडी पोलिस ठाण्यात गुन्हा दाखल करण्यात आला आहे.
दुसरी सोनसाखळी चोरीची घटना रविवारी दुपारी पावणेचारच्या सुमारास कात्रज दत्तनगर रोडवर घडली. मीरा गणपत माने (वय ५०, रा. समृद्धी हाइट्स, दत्तनगर, कात्रज) या पायी जात असताना चंद्रभागा परमिट रूमसमोर मोटारसायकलवरून आलेल्या दोघांनी त्यांच्या गळ्यातील सहा तोळे वजनाचे मंगळसूत्र व गंठण हिसका मारून तोडून नेले. या प्रकरणी भारती विद्यापीठ पोलिस ठाण्यात गुन्हा दाखल करण्यात आला आहे. तिसरी घटना सोनसाखळी चोरीची घटना ही विश्रामबाग पोलिस ठाण्याच्या हद्दीत घडली असून, या घटनेत एक तोळे वजनाचे दागिने चोरीला गेले आहेत. सांगवी पोलिस ठाण्याच्या हद्दीत घडलेल्या घटनेतही एका ज्येष्ठ महिलेचे एक तोळ्याचे दागिने हिसकावून नेले आहेत. याप्रकरणी गुन्हे दाखल करण्यात आले आहेत. शहरात पोलिसांची गस्त वाढविण्यात आली असली, तरी देखील सोनसाखळी चोरीच्या घटना थांबण्यात तयार नाहीत.
मोबाइल अॅप डाउनलोड करा आणि राहा अपडेट
