म. टा. प्रतिनिधी, लोणावळा
लोणावळा येथे रेल्वे वसाहतीच्या परिसरात रेल्वेगाड्यांमधील दोन फेरीवाल्यांना अंगावर पेट्रोल टाकून जिवंत जाळण्याचा धक्कादायक प्रकार बुधवारी पहाटे घडला. यामध्ये एकाचा मृत्यू झाला असून, आणखी एक जण गंभीर जखमी झाला आहे. आपसांतील वादांमधून झालेल्या या घटनेमुळे रेल्वे फेरीवाल्यांमध्ये भीतीचे वातावरण पसरले आहे.
अतुलसिंग जगजितसिंग भदोरिया (वय २०, रा. सध्या लोणावळा) असे या घटनेत मृत्यू झालेल्या फेरीवाल्याचे नाव असून, त्याचा साथीदार सचिनप्रताप शिवपाल सिंग (वय २२, रा. सध्या लोणावळा) या घटनेत गंभीररीत्या जखमी झाला आहे.
या प्रकरणी अमित अजमेरसिंग भदोरिया याला अटक करण्यात आली असून, त्याचा साथीदार सनी विजयपाल सिंग अद्याप फरारी आहे. लोणावळा शहर पोलिसांनी दिलेल्या माहितीनुसार अतुलसिंग आणि सचिन हे दोघे रेल्वेगाड्यांमध्ये फिरता व्यवसाय करत होते. ते दोघेही लोणावळा रेल्वे स्थानकाजवळील रेल्वे वसाहतीमध्ये भाड्याने राहत होते. सोमवारी त्यांची आणि अमित व सनी यांच्या रेल्वेमध्ये पाणी विकण्याच्या कारणावरून भांडणे झाली होती. या भांडणाच्या राग मनात धरून अमित आणि सनी यांनी बुधवारी पहाटे अतुलसिंग व सचिन हे त्यांच्या खोलीत झोपलेले असताना त्यांच्या अंगावर पेट्रोल टाकून त्यांना जिवंत जाळण्याचा प्रयत्न केला. या घटनेत अतुलसिंग पूर्णपणे भाजल्याने त्याचा उपचारा दरम्यान मृत्यू झाला, तर सचिन ८५ टक्के भाजला असून, त्यांच्यावर ससून रुग्णालयात उपचार सुरू आहेत. या घटनेमागील नेमके कारण समजले नसून, पुढील तपास लोणावळा शहर पोलिस ठाण्याचे सहायक पोलिस निरिक्षक श्रीकांत इंगवले करीत आहेत.
रेल्वेचे दुर्लक्ष भोवले
मागील काही वर्षांपासून लोणावळा रेल्वे स्थानक परिसरात गर्दुल्ल्यांचा मोठ्या प्रमाणात उपद्रव सुरू आहे. गर्दुल्ल्यांसह विविध व्यवसाय करणारे फेरीवाले, तृतीयपंथी यांचा रेल्वे आणि रेल्वेच्या उड्डाणपुलावर; तसेच परिसरात मोठ्या प्रमाणात उपद्रव सुरू असतो. यांच्यामध्ये वारंवार विविध कारणांवरून वाद होतात. काही वेळा या वादाचे हाणामारी व खुनात रूपांतर होते. आठ महिन्यांपूर्वीच रेल्वे स्थानकाच्या परिसरात एका गर्दुल्ल्याने एकाला अशाच प्रकारे जिवंत जाळण्याचा प्रकार केला होता. त्यात एक जण गंभीर भाजून मृत्यू झाला होता. असे असतानाही रेल्वेचे संबंधित विभाग याकडे हेतुपुरस्सर दुर्लक्ष करीत असल्याचा प्रवाशांचा आरोप आहे.
मोबाइल अॅप डाउनलोड करा आणि राहा अपडेट