म. टा. प्रतिनिधी, पुणे
डॉ. बाबासाहेब आंबेडकर संशोधन व प्रशिक्षण संस्थेतर्फे (बार्टी) येत्या वर्षात सामाजिक न्याय, समता, डॉ. बाबासाहेब आंबेडकर आणि अन्य थोर समाजसुधारकांशी निगडीत बाबींवर संशोधन करू इच्छिणाऱ्या (एम-फिल/पीएचडी) ४०० जणांना फेलोशिप दिली जाणार आहे. बार्टीतर्फे अनुसूचित जातीतील तरुणांसाठी ही फेलोशिप दिली जाते. मात्र, समता व सामाजिक न्याय वर्षाच्या निमित्ताने या वर्षी प्रथमच सर्व जाती-धर्माच्या तरुणांना फेलोशिप देण्याचा निर्णय घेण्यात आला आहे.
बार्टीतर्फे डॉ. बाबासाहेब आंबेडकर, महात्मा जोतिराव फुले, क्रांतिज्योती सावित्रीबाई फुले, छत्रपती शाहू महाराज यांच्या नावे २०१३ पासून नॅशनल रिसर्च फेलोशिप दिली जात आहे; तसेच येत्या वर्षापासून संत गाडगेबाबा व लोकशाहीर अण्णा भाऊ साठे यांच्या नावेही फेलोशिप दिली जाणार आहे आणि डॉ. बाबासाहेब आंबेडकरांच्या १२५ व्या जयंतीनिमित्त राज्य सरकारतर्फे समता व सामाजिक न्याय वर्ष साजरे केले जात आहे. त्यामुळे या वर्षी सर्व जाती धर्मातील १२५ जणांसाठी समता नॅशनल रिसर्च फेलोशिप देण्याचा निर्णय घेतला आहे. राज्य मंत्रिमंडळाने त्यास मान्यता दिली असून, शासन निर्णयही काढण्यात आला आहे. बार्टीतर्फे दिल्या जाणाऱ्या या सहा फेलोशिप योजनांमध्ये एकूण ४०० जणांना लाभ मिळणार आहे. त्यामध्ये महिलांसाठी विशेष आरक्षण ठेवले जाणार आहे.
प्रती महिना २५ हजार मानधन
या फेलोशिपसाठी बार्टीतर्फे वेळोवेळी जाहीराती प्रसिद्ध करून अर्ज मागविण्यात येतात. सर्व उमेदवारांची चाचणीद्वारे निवड केली जाते. निवड झालेल्या उमेदवारांना पहिल्या दोन वर्षांसाठी प्रती महिना २५ हजार रुपये मानधन दिले जाते. त्यापुढील तीन वर्षांसाठी २८ हजार रुपये मानधन दिले जाते. त्याबरोबर अन्य भत्तेही दिले जातात. अनुसूचित जातीतील विद्यार्थ्यांना योग्य मार्गदर्शक मिळत नसल्याने संशोधनाच्या क्षेत्रात ते मागे पडतात. त्यामुळे बार्टी हा फेलोशिप कार्यक्रम राबवित आहे, असे बार्टीचे महासंचालक डी. आर. परिहार यांनी सांगितले.
मोबाइल अॅप डाउनलोड करा आणि राहा अपडेट
