म. टा. प्रतिनिधी, पुणे
महापालिकेच्या मुख्य इमारतीवर पाणी पंपासाठी लागणारी वीज वाचविण्यासाठी बसविण्यात आलेली सोलर पॅनेल यंत्रणा धूळ खात पडली आहे. गेल्या दीड वर्षांपासून या यंत्रणेमधून ३० हजार युनीट वीज उपलब्ध होणे अपेक्षित असताना यामधून केवळ ३१८ युनिट वीज उपलब्ध झाली आहे. पालिकेतील अधिकाऱ्यांच्या दुर्लक्षामुळे ही स्थिती निर्माण झाल्याचा आरोप केला जात आहे.
महापालिकेच्या विद्युत विभागाच्या वतीने पालिकेच्या मुख्य इमारतीच्या टेरेसवर पाणी पंपासाठी लागणारी वीज वाचविण्यासाठी सोलर पॅनेल यंत्रणा बसविण्यात आली आहे. अकरा किलो वॅटची ही यंत्रणा असून यामधून सर्वसाधारण दिवसाला ५५ युनीट वीज तयार होण्याची क्षमता आहे. ही यंत्रणा बसविण्यासाठी २३ लाख ४६ हजार १८६ रुपये खर्च करण्यात आला आहे. मात्र, लाखो रुपये खर्च करून अपेक्षित हेतू साध्य होत नसल्याचा आरोप मनसेचे नगरसेवक वसंत मोरे यांनी केला. या युनीटच्या माध्यमातून साधारणपणे २० हजार ७५ युनीट इतकी वीज तर दीड वर्षांत ३० हजार युनीट वीज तयार होणे अपेक्षित होते. या यंत्रणेची जागेवर तपासणी केली असता या सोलर पॅनेलच्या डिजीटल मीटरमध्ये केवळ ३१८ युनीट वीज वापरल्याचे दिसून येत आहे.
जे पंप या सोलरच्या वीजेवर चालणे अपेक्षित होते ते एमएसईबीच्या विद्युत पुरवठ्यावर सुरू असल्याचे आढळून आले आहेत. यामुळे महापालिकेचे आर्थिक नुकसानही होत आहे. ही बाब महापालिका आयुक्तांच्या निदर्शनास आणून देण्यात आली आहे. या प्रकारांमध्ये दोषी असलेल्या संबंधित ठेकेदारला काळ्या यादीत टाकावे आणि विद्युत विभागाच्या अधिकाऱ्यांवर निलंबानाची कारवाई करावी, अशी मागणीही मोरे यांनी केली आहे.
मोबाइल अॅप डाउनलोड करा आणि राहा अपडेट