दहावी-बारावीच्या परीक्षेत गुणवंत ठरलेल्या महापालिका हद्दीतील विद्यार्थ्यांना पालिकेच्या वतीने देण्यात येणाऱ्या स्कॉलरशिपच्या अर्जांची माहिती पालिकेच्या अधिकृत वेबसाइटवर देण्यास पालिका प्रशासनाने अखेर सुरुवात केली आहे. यामुळे स्कॉलरशिपचा ऑनलाइनचा अर्ज नक्की कुठे जाऊन भरावा, याची माहिती विद्यार्थी आणि पालकांना मिळण्यास मदत होणार आहे.
पालिकेच्या वतीने दहावी, बारावीच्या विद्यार्थ्यांना दिल्या जाणाऱ्या स्कॉलरशिपची संपूर्ण माहिती पालिकेच्या वेबसाइटवर दिली जाईल, अशी घोषणा प्रशासनाने केली होती. अर्ज भरण्याची मुदत संपत आली असतानाही पालिकेच्या वेबसाइटवर माहिती देण्यात आली नसल्याची तक्रार विद्यार्थ्यांसह पालकांकडून करण्यात येत होती. याबाबतचे वृत्त 'मटा' ने प्रसिद्ध केले होते. या वृत्ताची दखल घेऊन प्रशासनाने स्कॉलरशिपची माहिती वेबसाइटवर देण्यास सुरुवात केली आहे.
दहावी, बारावीच्या गुणवंत विद्यार्थ्यांना स्कॉलरशिप घेण्याची अंतीम मुदत ३१ ऑगस्ट असून सध्या केवळ ऑनलाइन पद्धतीने विद्यार्थ्यांना हे अर्ज भरता येणार आहेत. हे अर्ज भरण्यासाची सोय पालिकेने sdd.punecorporation या वेबसाइटवर उपलब्ध करून दिली असल्याचे पालिकेतील अधिकाऱ्यांनी स्पष्ट केले.
मोबाइल अॅप डाउनलोड करा आणि राहा अपडेट