म. टा. प्रतिनिधी, पुणे
होस्टेलला निघालेल्या एका 'एमबीए'च्या विद्यार्थ्याला रात्रीच्या वेळी लिफ्ट मागणे महागात पडले आहे. कारमधील दोघा आरोपींनी वडगाव धायरी येथे या विद्यार्थ्याला पिस्तुलाच्या धाकाने शहरभर फिरवले आणि ५० हजार रुपायांना लुटले. खेड शिवापूर, हिंजवडी, देहू रोड आणि दिघी परिसरात फिरवत आरोपींनी विद्यार्थ्याच्या 'एटीएम'कार्डवरून ५० हजार रुपये काढून घेतले. दिघी येथे सोडताना त्याच्या डोळ्यात 'चिली स्प्रे' मारण्यात आल्याचा धक्कादायक प्रकार घडला आहे.
चंदन शर्मा (वय २०, रा. आंबेगाव बुद्रूक) असे तक्रार दाखल करण्यात आलेल्या विद्यार्थ्याचे नाव आहे. या प्रकरणी सिंहगड रोड पोलिस ठाण्यात दोघांविरुद्ध गुन्हा दाखल करण्यात आला. ही घटना गुरुवारी मध्यरात्री आठ ते बाराच्या दरम्यान घडली. शर्मा हा मुळचा राजस्थान येथील आहे. वडगाव परिसरातील एका बड्या कॉलेजमध्ये त्याने 'एमबीए'साठी अॅडमिशन घेतले असून, तो पंधरा दिवसांपूर्वीच पुण्यात आला आहे. गुरुवारी तो हिंजवडी येथे नातेवाइकांकडे गेला होता. रात्री आठच्या दरम्यान तो पुन्हा वडगाव येथे परतला. स्वतःचे वाहन नसल्याने तो पायीच आंबेगाव येथे होस्टेलवर जात होता. पायी जात असताना एक कार अचानक त्याच्याजवळ येऊन थांबली. आंबेगावला जाण्यासाठी २० रुपये द्यावे लागतील, असे त्याला सांगण्यात आले. शर्मा हा होकार दर्शवत त्या कारमध्ये बसला. आरोपींनी विद्यार्थ्याला पिस्तुलाचा धाक दाखवला.
शर्मा कारमध्ये बसल्यानंतर चालकाने वेग वाढवला आणि कार खेड शिवापूरच्या दिशेने नेली. शर्माने कार थांबवण्यासाठी चालकाला विचारणा केली. मात्र, चालकाशेजारी बसलेल्या आरोपीने त्याला शिवीगाळ करत पिस्तुलाचा धाक दाखवला. आरोपींनी त्याच्याकडे पैशाची मागणी केली. मात्र, त्याच्या खिशात फारच थोडे पैसे होते. त्याने नुकताच हिंजवडी येथे नवीन मोबाइल विकत घेतला होता. आरोपींनी त्याच्याकडील ते दोन्ही मोबाइल हिसकावले. फिल्मीस्टाईलने कारमध्येच गोळी झाडण्याचा दिखावा करण्यात आला, तसेच त्याच्यासमोर पिस्तुलात काडतूस भरण्यात आले.
'एटीएम'मधून रोकड काढली
खेड शिवापूर येथील एका 'एटीएम' सेंटरसमोर कार थांबवण्यात आली. शर्माकडून जबरदस्तीने 'एटीएम' कार्ड तसेच पिननंबर मिळवण्यात आला. त्यातील एका आरोपीने 'एटीएम'मध्ये जाऊन पैसे काढले. जेलमध्ये असलेल्या एका मित्राला सोडवण्यासाठी पैसे लागत असल्याचे त्यांनी शर्माला सांगितले. त्यानंतर आरोपी हिंजवडीला गेले. तेथेही त्यांनी एका 'एटीएम' सेंटरमधून पैसे काढले. आरोपी पुन्हा देहू रोड येथे गेले. तेथेही पैसे काढले. अशा प्रकारे 'एटीएम'वरून ५० हजार रुपये काढण्यात आले. त्यानंतर आरोपी दिघीच्या दिशेने गेले. निर्जन रस्ता पाहून त्यांनी कार थांबवली. शर्माकडील पॅनकार्ड, आधार कार्ड इलेक्शन कार्ड हिसकावले आणि त्याच्या डोळ्यात 'चिली स्प्रे' मारून पळ काढला.
स्थानिकांनी केली मदत
'चिली स्प्रे' डोळ्यात गेला असल्याने शर्माचे डोळे चूरचूरत होते. त्याच अवस्थेत तो काही अंतर चालत गेला. रस्त्याच्या कडेला असलेले एका घराचा दरवाजा त्याने रात्री एकच्या सुमारास खटखटवला. घर मालकाने दरवाजा उघडल्यानंतर त्याने सर्व हकिकत त्यांना सांगितली आणि डोळे धुण्यासाठी पाणी मागितले. त्यानंतर तेथूनच रिक्षाने तो नऱ्हे येथे एका खासगी हॉस्पिटलमध्ये उपचारांसाठी दाखल झाला. हॉस्पिटलने घटनेची माहिती वाकड पोलिसांना दिली. वाकड पोलिसांकडून सिंहगड रोड पोलिसांना सांगण्यात आले. शर्मा हा नुकताच पुण्यात आला असल्याने आरोपींनी त्याला कुठे फिरवले, कोठून पैसे काढले, हेही नीट सांगता येत नव्हते, असे सिंहगड पोलिसांनी सांगितले.
चार महिन्यांत पाच घटना
हिंजवडी, निगडी, किवळे परिसरात अशा प्रकारे लुटमार करण्याच्या चार घटना एप्रिल महिन्यापासून घडल्या आहेत. हिंजवडी परिसरात स्वतःचे वाहन नसलेल्या आणि लिफ्टची गरज असणाऱ्या सॉफ्टवेअर इंजिनीअरला लुटण्याच्या घटना घडल्या आहेत. आरोपींकडून या नागरिकांच्या खिशातील पैसे तर हिसकवण्यात आले, परंतु शक्य असेल तर एटीएममधून रोकडही काढण्यात आली आहे. यातील बहुतेक घटना उघडकीस आलेल्या नाहीत.
मोबाइल अॅप डाउनलोड करा आणि राहा अपडेट
