तिघे जण जखमी, स्थानिक धावले मदतीला
म. टा. प्रतिनिधी, पुणे
सिंहगड घाटातून पुण्याकडे परतताना जीप दरड पॉइंटवरून ३०० फूट खोल दरीत कोसळल्याची घटना शुक्रवारी दुपारी घडली. या अपघातात गाडीतील तीन पर्यटक जखमी झाले आहेत. स्थानिक नागरिक आणि घेरा सिंहगड वनसंरक्षण समितीच्या सुरक्षारक्षकांनी वेळीच केलेल्या धावपळीमुळे तिघाही पर्यटकांना सुखरूप बाहेर काढण्यास यश आले आहे.
जवाहर मरोडिया, अनिल मरोडिया आणि रमेश रोजंडा अशी या जखमींची नावे आहेत. सिंहगड घाट रस्त्यावर दुपारी दोनच्या सुमारास हा अपघात झाला. अपघातात जखमी झालेले तिघेही मूळचे राजस्थानचे असून सध्या कात्रज येथील आमग परिसरात वास्तव्यास आहेत. कोंढणपूर अवसरवाडी येथे बांधकाम ठेकेदारीचे काम झाल्यानंतर दुपारी ते गडावर फिरायला गेले होते. गडावरून दुपारी दोनच्या दरम्यान गाडीतून परत येत असताना कोंढणपूरच्या फाट्यापासून काही अंतरावर वळणाचा अंदाज आल्याने मोटार अचानक खोल दरीच्या डाव्या बाजूच्या कठड्याला धडकली. पावसाळ्यामुळे कठडा मोडकळीस आलेला असल्याने जोराच्या धडकेमुळे तो तुटला. आणि गाडी थेट सुमारे तीनशे फूट खाली दरीत जाऊन एका झाडाच्या मोठ्या फांदीला अडकली. अपघाताची माहिती मिळताच स्थानिक कार्यकर्ते कैलास जरांडे, युवराज पायगुडे, भानुसाद घोगरे आणि वनसमितीचे सुरक्षारक्षक रोहित पढेर तत्काळ घटनास्थळी पोचले. दरीत उतरून जखमींना मदत केली. दरम्यान, दुसरे पथकही दोर लावून गाडीजवळ पोहोचले.
संजय गायकवाड, नंदू, जोरकर, विक्की दुधाने आदींनी दोराच्या साह्याने जखमींना दरीतून सुखरूप बाहेर काढले. यातील रमेश रोंजडा हे गंभीर जखमी झाला असून जवळच्या खासगी रुग्णालयात त्यांच्यावर उपचार सुरू आहेत.
मोटार दरीत झाडाला अडकली नसती तर तेथून खालील बाजूस असलेल्या खोल कड्यावरून खाली गेली असती. त्या दरीत मदतीसाठी पोहोचणे देखील अवघड होते, झाडांमुळे तिघेही बचावले, अशी माहिती वनसंरक्षण समितीचे संजय गायकवाड यांनी दिली. स्थानिक कार्यकर्ते माऊली कोडीतकर यांनी त्यांच्या खासगी वाहनातून जखमींना तातडीने पायथ्याशी आणले, दरम्यान जिल्हा परिषदेची १०८ क्रमांक रुग्णवाहिका पायथ्याशी दाखल झाली होती. तिघांवरही सध्या खासगी हॉस्पिटलमध्ये उपचार सुरू आहेत.
सिंहगड रस्त्यावरील कठडे धोकायादक
सिंहगड घाट रस्त्याचे दोन वर्षांपूर्वीच नूतनीकरण झाले. मात्र, गेल्या वर्षी पडलेल्या दरडीमुळे रस्त्यावर अनेक खड्डे पडले आहेत. गेल्या वर्षी रस्त्याच्या कडेला पडलेले दरडीचे दगड वन विभागाने अद्यापही उचलेले नाहीत. घाट रस्त्यावरील अनेक ठिकाणचे कठडे तुटलेले आहे तर काही ठिकाणी कठडे मोडकळीस आले आहेत. याबाबत वनसंरक्षण समितीच्या प्रतिनिधींनी वारंवार पाठपुरावा करूनही वनाधिकारी दुर्लक्ष करीत आहेत. एवढेच नव्हे तर घाटात दरड पडण्याचा धोका कायम असल्याचे खुद्द वन विभागानेही मान्य केले आहे. दरडींचे प्रकार टाळण्यासाठी सार्वजनिक बांधकाम विभागाला निधी देखील देण्यात आला आहे. पावसाळा संपल्याशिवाय आम्ही काहीच करणार नाही, अशी भूमिका त्यांनी घेतली आहे. दरम्यान, पुण्याच्या जिल्ह्याधिकाऱ्यांनी देखील महिनाभरापूर्वी घाटरस्त्याची पाहणी केली होती. पण, पर्यटकांच्या सुरक्षेच्या दृष्टीने कोणताही ठोस निर्णय घेण्यात आलेले नाहीत.
रुग्णवाहिकेची नुसती आश्वासने
सिंहगडवर हजारो पर्यटक फिरण्यासाठी येतात; मात्र त्यांच्या सुरक्षेच्या दृष्टिकोनातून प्रशासनाने अद्याप सुरक्षा ऑडिट केलेले नसल्याची वृत्त मालिका 'मटा'ने सहा महिन्यांपूर्वी प्रसिद्ध केली होती. याची दखल घेत आपत्कालीन परिस्थिती लक्षात घेऊन सिंहगडावर दोन महिन्यांत पूर्णवेळ रुग्णवाहिका देणार असल्याचे आश्वासन दिले होते. त्यानंतर गिरीप्रेमी संस्थेने घेरा समितीच्या स्वयंसेवकांना आपत्कालीन परिस्थिती हाताळ्ण्याबाबत दोन दिवसांचे प्रशिक्षण दिले. दरम्यान, सिंहगडावर झालेल्या एका कार्यक्रमात दोन महिन्यांपूर्वी महापौर दत्ता धनकवडे यांनीही रुग्णवाहिका देणार असल्याचे जाहीर केले. मात्र, अद्याप एकही रुग्णवाहिका मिळालेली नाही.
गडावर जा... पण जपून
सिंहगडावर दर वर्षी १५ ऑगस्टला मोठ्या संख्येने पर्यटक हजेरी लावतात. आज (शनिवार) पर्यटकांची संख्या अपेक्षित धरून घेरा सिंहगड समितीतर्फे गडावरील बंदोबस्त वाढविण्यात येणार आहे. मात्र, पर्यटकांनीही घाट रस्त्यावर गाडी चालवताना आणि गडावर फिरताना काळजी घ्यावी. घाट रस्त्यावरील अनेक कठडे घसरडे आणि धोकादायक आहेत. धुक्यामुळे दरीच्या खोलीचा अंदाज येत नाही. कड्यावरून फोटो काढताना पायाखालचा मुरूम अनेकदा सरकतो अथवा घसरतो, अशावेळी तोल जाण्याची शक्यता असते. त्यामुळे पर्यटकांनी पायवाटा आणि गडावरील पादचारी मार्ग सोडून इतरत्र भटकंती करू नये, असे आवाहन घेरा सिंहगड समितीतर्फे कऱण्यात आले आहे.
मोबाइल अॅप डाउनलोड करा आणि राहा अपडेट
