'श्रावणक्वीन २०१४' या स्पर्धेत अंतिम फेरीत उपविजेती ठरलेली रिचा लाखे सध्या जाहिरातींमध्ये झळकते आहे. व्यवसायानं मेकॅनिकल इंजिनीअर असलेल्या रिचाला अभिनय आणि मॉडेलिंगचं क्षेत्र पहिल्यापासूनच खुणावत होतं. आपल्या या स्वप्नाकडे वाटचाल करण्यासाठी 'श्रावणक्वीन' स्पर्धा ही पहिली आणि आश्वासक पायरी ठरल्याचं ती सांगते.
अंतिम फेरीतील परीक्षक अभिनेता श्रेयस तळपदे, सिनेमा निर्माती पूनम शेंडे, दिग्दर्शक अक्षय दत्त आणि अभिनेत्री विभावरी देशपांडे यांनी तिचं कौतुक केलं होतं. नोकरी सांभाळून ही धडपड कायम ठेवत तिनं काही हिंदी-मराठी मालिका, सिनेमे आणि जाहिरातींसाठी ऑडिशनही दिल्या आहेत. सध्या ती एका तेलाच्या जाहिरातीमध्ये ती दिसते आहे.
याबाबत रिचा सांगते, 'वर्तमानपत्राच्या पहिल्या पानावर झळकणं, हा अनुभवच खूप वेगळा असतो. श्रावणक्वीन स्पर्धेच्या वेळी ही संधी मला पहिल्यांदा मिळली, त्यानंतर मी पहिल्या पानावर आले, ते या जाहिरातीमुळे.'
'श्रावणक्वीन'मुळे रिचाची निवड एका कॅलेंडर शूटसाठीही झाली. त्याचबरोबर 'निकॉन' कॅमेऱ्याच्या 'वेडिंग थीम'साठीच्या कमर्शिअल शूटमध्येही तिची वर्णी लागली. आपल्या स्वप्नाकडे गेल्या वर्षभरात केलेली ही वाटचाल म्हणजे श्रावणक्वीननं केलेली पायाभरणी होती, असं ती सांगते. 'श्रावणक्वीनच्या निमित्तानं आपल्यातील बलस्थानं मला ओळखता आली. ग्रुमिंग सेशन्समुळे तज्ज्ञांचं मार्गदर्शन मिळालं, जे एरवी आम्हाला कधीच लाभलं नसतं. माझ्यातील कलागुण यामुळे अधिक 'पॉलिश' झाले. काही सुधारणा करता आल्या. रॅम्पवॉकचा आत्मविश्वास, अॅटिट्यूड आणि मुख्य म्हणजे संधी मिळाली.'
अभिनय आणि मॉडेलिंगच्या क्षेत्रात मला यायची इच्छा होती. त्याची उत्तम सुरुवात श्रावणक्वीन स्पर्धेमुळे झाली. या स्पर्धेनं मला आत्मविश्वास मिळाला. प्रसिद्धी मिळाली. वेगवेगळ्या संधींची दारंही खुली झाली.
- रिचा लाखे
मोबाइल अॅप डाउनलोड करा आणि राहा अपडेट
