महसूलविषयक अधिनियम आता मराठीत अँड्रॉइड अॅपवर उपलब्ध होणार आहेत. पुणे जिल्हाधिकारी कार्यालयाने पुढाकार घेऊन 'डिजिटल इंडिया' मोहिमेच्या निमित्ताने महसूल अधिनियम फोनवर उपलब्ध करून दिले आहेत. त्यामुळे नागरिकांना आपल्या कामांसाठी आवश्यक नियमांची माहिती मोबाइलवरच उपलबध होणार आहे.
विभागीय आयुक्त एस. चोक्कलिंगम यांच्या हस्ते सोमवारी या अॅपचे उद्घाटन झाले. जिल्हाधिकारी सौरव राव, अतिरिक्त जिल्हाधिकारी प्रदीप पाटील, निवासी उपजिल्हाधिकारी सुरेश जाधव, जिल्हा पोलिस अधीक्षक डॉ. जय जाधव आदी या वेळी उपस्थित होते. महाराष्ट्र जमीन महसूल अधिनियमांची (एमएलआरसी) अनेक नागरिकांना वेळोवेळी गरज भासते. तातडीच्या वेळी हे नियम मराठीत लगेच उपलब्ध होत नाहीत. त्यामुळे नागरिकांची अडचण होते. हे टाळण्यासाठी 'डिजिटल इंडिया' मोहिमेअंतर्गत हे अॅप नागरिकांना उपलब्ध करून देण्यात आले आहे. अँड्रॉइड फोनधारकांना प्लेस्टोअरमध्ये जाऊन mlrc नावाचे हे अॅप डाउनलोड करून घेता येणार आहे. त्यात मराठीमध्ये संपूर्ण अधिनियम, नियम, आवश्यक परिशिष्टे देण्यात आली आहेत. त्याबरोबरच या अॅपमध्ये सर्च ऑप्शनही देण्यात आला असून, नागरिकांना त्याद्वारे विशिष्ट नियम किंवा संदर्भांचा शोधही घेणे शक्य आहे.
यासाठी महसूल विभागातील अधिकारी-कर्मचाऱ्यांनी डेटा तयार केला असून, 'रियल आयटी सर्व्हिसेस प्रायव्हेट लिमिटेड'ने तांत्रिक साह्य केले आहे. अशा स्वरूपात संपूर्ण अधिनियम उपलब्ध करून देणारे हे मराठीतील पहिलेच अॅप ठरले आहे. दरम्यान, या वेळी उपस्थित अधिकाऱ्यांना केंद्र सरकारच्या नव्या डिजिटल लॉकरसंदर्भात प्रशिक्षण देण्यात आले. राष्ट्रीय माहिती केंद्राचे धनंजय कुलकर्णी यांनी याबाबत माहिती दिली. नागरिकांचा त्रास वाचवण्यासाठी आणि हेलपाटे टाळण्यासाठी तंत्रज्ञानाच्या माध्यमातून अधिकाधिक सेवा द्याव्यात, असे आवाहन चोक्कलिंगम यांनी या वेळी केले.
मोबाइल अॅप डाउनलोड करा आणि राहा अपडेट